Nga Desada METAJ
Debati më i nxehtë i ditëve të fundit, ai për riciklimin e mbetjeve sado që ka marrë zërin e shoqërisë civile ka një prapavijë të fortë politike.
Pikërisht këta aktorë, që javët e fundit kanë ndryshuar rolet përpiqen t’i imponojnë publikut qëndrime diametralisht të ndryshme për të njëjtën çështje. Ndërsa, palët janë përfshirë në garën e populizmit, asnjëra nga partitë politike apo përfaqsuesit e shoqërisë civile nuk di t’i japë përgjigje pyetjes: Pse stuhia nisi vetëm 10 ditë më parë, ndërkohë që ligji është depozituar në Kuvend në datën 30 qershor?
A vë kjo në dyshim sinqeritetin e palëve që tani kanë egërsuar qëndrimet kundër riciklimit të mbeturinave?
Nuk mund të kem një përgjigje të saktë për shoqërinë civile të angazhuar në këtë proces. Megjithë skepticizmin për rolin e shoqatave për mbrojtjen e mjedisit, një pjesë e të cilave paguhen me fonde të qeverisë, shumë individë me integritet i janë bashkuar kësaj lëvizjeje qytetare që si rrallëherë mori dhe përmasa të mëdha. Ajo që ngre më shumë dyshime në këtë rast është roli i PD-së, si partia më e madhe në opozitë e cila ravijëzoi qëndrimin e saj për një ligj kaq të rëndësishëm vetëm kur konstatoi se “zhurma” ndaj plehrave u rrit ndjeshëm.
Ndryshimet e reja e bëjnë ligjin thuajse të njëjtë me atë të 2011-ës, të cilin Sali Berisha e mbrojti fort deri në fund të qeverisjes së tij dhe që u shndërrua në kalin e betejës së Edi Ramës. Aq e vërtetë është kjo sa Edi Rama e mbajti premtimin dhe e shfuqizoi këtë ligj në mbledhjen e parë të qeverisë në shtator 2013.
Deri sa rikthimi i tij për diskutim i vuri palët përballë sërish. Por tani qëndrimet janë aq të kundërta, sa Lulzim Basha u detyrua të kërkojë falje për miratimin 5 vjet më parë dhe Sali Berishën të justifikojë reflektimin e tij me argumentin se Shqipëria ka kontroll të dobët në dogana.
Por, sa e sinqertë është PD në këtë qëndrim, kur vetëm një ditë përpara se ligji të miratohej në kuvend, grupi parlamentar demokrat nuk kishte ende një vendim të qartë për votën apo qëndrimin që do të mbante?
Nëse PD mendonte se ky ligj është i pazbatueshëm për kushtet e Shqipërisë pse nuk doli pararojë dhe “t’ia rrëmbente” këtë kauzë shoqërisë civile? Kjo do të ishte shumë më dinjitoze se sa të shfaqej në krah të saj, e paftuar, me inate me shumë se me argumenta. Në rastin më të mirë, PD duhet të jetë e qartë nëse do mbrojë interesat e investitorëve siç ndodhi 5 vjetë më parë apo do të ndryshojë diametralisht qëndrim minutat e fundit vetëm se sheh një protestë kundër Edi Ramës?
Një ndjesë e sinqertë është ajo që merret në kohën dhe vendin e duhur, ajo është dhe më e besueshme për një publik që më shumë se informacion ka ndjeshmëri kur flitet për “plehrat”. Partia Demokratike e humbi këtë shans, kur preferoi të bënte pushime verore dhe jo të fliste për “ligjin e plehrave”, kur zgjodhi të arratiset e gjitha në Dibër në vend që të bënte opozitën për “plehrat”, kur numëronte çdo kilogram hashash të mbjellë në vend, por nuk foli kurrë për “plehrat” derisa ato u miratuan në qetësi të plotë në parlament.
Përshtatja e qëndrimeve të një partie politike është e drejtë e saj legjitime, por është e dhimbshme të shohësh sesi një parti politike, frymëzuese dhe organizatore e protestave më të mëdha në vend, të varë shpresat për nxitjen e pakënaqësisë popullore kundër qeverisjes tek disa protesta kaotike të shoqërisë civile. E njëjta që punoi me Edi Ramën për të rrëzuar Partinë Demokratike nga pushteti.
