Oficeri i policisë gjyqësore që u kap mat duke marrë rryshfet 18 mijë euro është zhdukur prej ditës kur u publikua video në emisionin invetigativ “Stop”.
Sot Gjykata e Krimeve të Rënda vendosi në mungesë, masën e sigurisë “arrest me burg pa afat” për oficerin e policisë gjyqësore, i cili akuzohet për korrupsion.
Emisioni “Stop” denoncoi një javë më parë rastin e biznesmenit Gani Manollari të cilit i ishin kërkuar para për të zhbllokuar llogarinë bankare.
Llogaria ishte vënë nën sekuestro pasi dyshohej për para të pista dhe mbahej e bllokuar për plot 2 vjet. Vetëm pasi dha rryshfet 18 mijë euro, llogaria me 150 mijë euro e biznesmenit u zhbllokua.
Në kameran e fshehtë oficeri i policisë thoshte se këto para janë për prokurorin Ardian Braho. Por në një dëshmi dhënë në prokurori pak ditë më parë prokurori ka mohuar lidhjen me këtë ngjarje. Ai ka thënë se oficeri ka përdorur emrin e tij per te marre rryshfet.
