Analisti Andrea Stefani ka theksuar nëpërmjet një shkrimi se protesta e Partisë Demokratike kundër ligjit për importin e mbetjeve që do të mbahet më 1 tetor është në fakt një protestë kundër reformës në drejtësi.
“Ndërkaq futja në lojë e PD dhe akoma më keq, me profil shumë të lartë e Sali Berishës, e ka devijuar qëllimin e protestës së projektuar nga disa organizata të shoqërisë civile. Nga protestë për mjedisin ajo është shndërruar në protestë për pushtetin”, shkruan Stefani.
Sipas tij “ajo është një protestë e PD që synon të krijojë iluzionin se masat po i shkojnë pas dhe se po vjen ora që ajo të rikthehet në pushtet”, shkraun ai për “Dita”.
“Por nuk duhet harruar se rimarrja e pushtetit nga Berisha kërkohet jo se e ha meraku për plehrat, ligjin për importimin e të cilave ai e ka miratuar katër herë, as shqetësimi për cilësinë e qeverisjes së sotme që është ku e ku më e mirë se ajo e tija që ishte katastrofë dhe la pas gropa dhe piramida katastrofike, por është një pushtet që kërkohet për te bllokuar reformën në drejtësi që kërcënon me ndëshkimin e korrupsionit përfshirë edhe atë të klanit Berisha-Basha. Prandaj ,në thelbin e saj të fshehtë, të maskuar me alarmizmin e stisur për “plehrat”, protesta e sotme do të jetë kundër reformës në drejtësi”, përfundon analisti.
