Deputeti i Partisë Socialiste, Eduart Ndocaj ka rënë pre e dhunës fizike në Prizren, 3 ditë më parë. Pas lajmit të publikuar në media, ai e mohoi këtë fakt, duke e quajtur si sulm dashakeqas politik. Por zëdhënësi i Policisë së Prizrenit, Hazir Berisha e konfirmon ngjarjen. Sipas raportit të Policisë së Prizrenit, dy të rinjtë e kanë sulmuar atë dhe shoferin e tij, për shkaqe që ende nuk dihen, teksa ishin ndalur në një pikë karburanti.
“Të dielën u ndalua një prej autorëve, ndërsa një ditë më vonë edhe autori tjetër. Njëri është shtetas i Kosovës, ndërsa tjetri, shtetas i Shqipërisë. Që të dy ndodhen në stacionin e Policisë së Prizrenit dhe priten të dalin për masën e sigurisë në gjykatën vendase”, tha zëdhënësi i policisë.
Në disa media kosovare thuhet se, deputeti ka qenë i shoqëruar edhe me një këngëtare të njohur shqiptare, por në raportin e policisë emri i saj nuk përmendet.
Sakaq Ndocaj përmes statuseve në rrjetet sociale thotë se “jam si kokrra e mollës e nuk kam asnjë lloj shenje dhune. Këtë e konsideroj si sulm të radhës me prapavijë politike”.
Ndocaj gjendej në Kosovë, gjatë fundjavës që lamë pas, ku mori në Pejë titullin “Politikani i vitit”. Rrugës teksa kthehej për Tiranë ai ra pre e dy agresorëve. Nuk dihet ende se çfarë fshihet pas kësaj ngjarje. Pra nuk dihet motivi i rrahjes së Ndocajt.
