Një organizatë kriminale e shfrytëzimit të prostitucionit dhe kultivimit të marijuanës është zbuluar nga policia italiane në Torino.
Nën një sërë akuzash si ajo e “rekrutimit, shfrytëzimit dhe prostitucionit të detyruar si dhe armëmbajtje pa leje, grabitje dhe prodhim droge”, janë vënë 10 shqiptarë, 7 prej tyre femra.
Siç raporton Torino Today, prostitutat kontrolloheshin pa dijeninë e tyre përmes një aplikacioni të instaluar në telefonat e tyre dhe lekët e fituara nga shfrytëzimi i tyre, rreth 300 euro në ditë, banda i përdorte për prodhimin industrial të marijuanës. Një aktivitet që gjeneronte miliona euro.
Hetimet për bandën kriminale kishin nisur në gusht të vitit 2015, kur në Giulio Cesare dhe Via di Stura Ala në periferi të Torinos pati një sul armësh ndaj disa prostitutave nigeriane.
Kjo tregoi se trafikantët shqiptarë nuk e toleronin praninë e prostitutave të tjera në atë zonë.
Prostitutat nxirreshin në rrugët e Volpianos dhe Cuneo, por shfrytëzuesit kishin krijuar një mënyrë komode për t’i kontrolluar ato përmes një aplikacioni.
Me këtë të fundit shfrytëzuesit ishin në dijeni të gjithçkaje që prostitutat bënin.
Por brenda disa muajsh policia zbuloi 3 plantacione të marijuanës me rreth 4 mijë bimë në Corio, Mortara dhe Abbiategrasso si dhe të gjitha pajisjet e duhura për kultivimin e tyre, llamba për përshpejtimin e procesit të rritjes dhe tharëse.
