Për vdekjen e Aida Çajkës, gruas shtatzënë që ndërroi jetë bashkë me foshnjen në maternitet mjekët nuk ka pranuar të flasin rreth situatës, për të mos rënduar me sa duket situatën e kolegeve të tyre apo të institucionit që drejtohet nga Rubena Moisiu.
Eshtë një mjek që pranon të flasë për situatën me pacienten dhe çfarë ndihme iu dha nga bluzat e bardha. Arjan Mezini, është nëndrejtori i teknik i spitali Universitar të Sëmundjeve të Brendshme “Shefqet Ndroqi” e njëherazi mjek tek ky spital që ka dhënë një interviste për televizionin Report TV.
Ai tregon gjithë ecurinë se si mbërriti pacientja në Sanatorium dhe si më pas u përcoll sërish në maternitet.
“Pacientja ka ardhur rreth orës 2 të mëngjesit këtu pranë shërbimit të urgjencës së spitalit tonë e dërguar nga urgjenca e Qendres Spitalore Nënë Tereza me dyshimin për trombozë ose e thënë ndryshe mpiksje gjaku në mushkëri.
Pacientja ka qenë në gjendje relativisht të rëndë me tension diku te 8 me 5 dhe ajo që u vu re ishte një rënie e kuadrit të gjakut, hemoglobinës dhe të ritrocideve. Pasi u bë gjithë dignostifikimi u përjashtua që nuk kishte probleme pleumonare.
Pacientja u shoqërua me ambulancën tonë me mjeken roje dhë një infermiere drejt ‘Koço Glioxhenit’ për të vazhduar zgjidhjen e problemit.
Njihen rastet kur ka mpiksje gjaku gjatë shtatzanisë dhe që mund të prekin dhe mushkërinë. Rasti u dërgua nga QSUT në këtë drejtim pasi ata kanë përjashtuar problemet për të cilat u dërgua. Nuk kishte problem të tilla prandaj pacientja u përcoll.
Këtu është bërë grafia dhe analizat e gjakut dhe u pa që nuk korrespondohej me dyshimin që ishte hedhur. U pa që tensioni po binte dhe kuadri i gjakut i korrespondonte më tepër një humbjeje, se ku nuk mund ta përcaktojmë dot dhe prandaj e ridërguam me ambulancën tonë të shoqëruar nga mjekja dhe duke u ngarkuar me likide që të ruheshin tensionet”, përfundon mjeku rrëfimin.
