Organi më i lartë qeverisës i futbollit në botë, FIFA, ka publikuar në faqen e saj të internetit një lajm sqarues për situatën e futbollistëve me origjinë kosovare që kanë përfaqësuar më parë skuadra të tjera kombëtare dhe tani duan të zgjedhin atë të Kosovës.
FIFA e fillon sqarimin e saj duke bërë të ditur se Federata e Futbollit të Kosovës ka bërë kërkesë për lejimin e ndryshimit të ekipit kombëtar të futbollistëve që përfshihen në dy kategori: ata që nuk kanë luajtur asnjë ndeshje zyrtare me përfaqësueset e mëparshme dhe ata që kanë luajtur në ndeshje zyrtare me përfaqësueset e mëparshme.
Sipas FIFAs, pasi u shqyrtuan situatat e çdo futbollisti, u arrit në përfundimin që Rregullorja për Aplikimin e Statuteve të FIFAs nuk e parashikon qartë se si duhet vepruar në raste të tilla. Për këtë shkak u vendos që vendimet për ndryshimin e përfaqësueseve të merreshin nga Komiteti i FIFAs për Statusin e Lojtarëve në mënyrë individuale për secilin prej tyre. Pas shqyrtimit të çdo kërkese në veçanti, Zyra e Komitetit për Statusin e Lojtarëve vendosi t’u japë leje disa futbollistëve që kishin bërë kërkesë për të ndryshuar ekipin përfaqësues.
Gjithashtu, Zyra e Komitetit për Statusin e Lojtarëve ka sqaruar që lejet janë dhënë për çdo futbollist që nuk ka luajtur një ndeshje zyrtare me përfaqësuesen e mëparshme pas datës 13 Maj 2016, datë në të cilën Kosova u bë anëtare me të drejta të plota në FIFA. Sipas këtij sqarimi, automatikisht çdo futbollist që mori pjesë në EURO 2016 dhe u aktivizua qoftë edhe një minutë, nuk mund të zgjedhë të përfaqësojë Kosovën.
Në këtë mënyrë, Granit Xhaka, Xherdan Shaqiri, Valon Behrami dhe Shani Tarashaj, të cilët u aktivizuan në të paktën një ndeshje me Zvicrën në EURO 2016 nuk mund të ndryshojnë ekipin kombëtar. Gjithashtu edhe të gjithë futbollistët nga Kosova që luajtën të paktën një minutë për Shqipërinë në EURO 2016 nuk mund të largohen drejt Kosovës. Ky sqarim lë gjithashtu të kuptohet se nëqoftëse kanë dëshirë, Adnan Januzaj, Besart Berisha, Valdet Rama, Loret Sadiku, apo edhe ndonjë futbollist tjetër që ka luajtur më parë për ekip tjetër kombëtar, kanë të drejtë të kërkojë kalimin te Kosova.
