Një 35vjeçar ka kërkuar urdhër mbrojtjeje, duke denoncuar për kanosje e dhunë psikologjike bashkëshorten e tij.
Burime nga Policia e Tiranës thanë dje se kallëzimi është bërë në Komisariatin nr.5, ku shtetasi me iniciale A.M. është paraqitur të dielën për të denoncuar të shoqen.
Sipas kallëzimit të tij, gruaja, shtetasja me iniciale B.M., 38 vjeçe, prej disa javësh ushtron dhunë psikologjike ndaj tij dhe mbrëmjen e së shtunës e ka kërcënuar se do ta vrasë, në rast se do të merrte vesh se ai e tradhton.
Për këtë arsye, i dëmtuari është paraqitur për të bërë denoncim në Polici, ku njëkohësisht i është plotësuar edhe kërkesëpadia për lëshimin e urdhrit të menjëhershëm të mbrojtjes.
Nga ana tjetër, Policia ka nisur procedim penal ndaj shtetases B.M., bashkëshortja e të dëmtuarit, me akuzën e kanosjes dhe ka referuar materialet në Prokurori.
“U referuan materialet në Prokurori, për shtetasen B.M., 38 vjeçe, banuese në Zallmner, pasi dyshohet se, për motive të dobëta, ka kanosur bashkëshortin A.M., 35 vjeç”, tha dje Policia.
