Njëqind mijë euro i takojnë Majlinda Kelmendit nga shteti i Kosovës për fitimin e medaljes së artë olimpike. Kjo vlerë parashikohet për medaljen e artë në rregulloren për ndarjen e shpërblimeve shtetërore për sportistët që arrijnë rezultate të larta në garat ndërkombëtare. Ky rregull është në fuqi prej qershorit të vitit 2013.
Por, në Federatën Kosovare të Xhudos, janë të bindur se xhudistja meriton një shpërblim financiar shumë herë më të madh, përveç atij që e ka të garantuar ligjërisht. Në FKXH-së thuhet se ajo që ka arritur Majlinda në Rio është e jashtëzakonshme dhe në të njëjtën mënyrë duhet të jetë edhe shpërblimi i shtetit për të. Dhe shuma që përmendet është 1 milion euro, që sipas drejtuesve të Federatës do të ishte në përputhje me atë që ka bërë Majlinda Kelmendi për shtetin e Kosovës.
25-vjeçarja nga Peja, të dielën në “Rio 2016” bëri historinë. Ajo fitoi medaljen e artë olimpike në xhudo, në kategorinë deri në 52 kilogram. Titulli olimpik vlerësohet si diçka e jashtëzakonshme, pasi kjo është vetëm pjesëmarrja e parë e Kosovës në ngjarjen më të madhe sportive. Titulli olimpik i bashkohet dy titujve të botës dhe dy të Europës që ka fituar xhudistja më herët. Ajo ka përfituar disa herë shpërblime nga shteti në bazë të ligjeve, por xhudistët kërkojnë që për suksesin historik të ketë një shifër të madhe.
Trajneri
“Moment që kërkon reflektim. A meriton Majlinda të ketë diçka të jashtëzakonshme? Mendoj se po. Shteti duhet ta shpërblejë si duhet këtë sukses të saj”, ka shkruar trajneri i Kosovës në xhudo, Driton Kuka në profilin e tij në “Facebook”, duke paraqitur edhe një deklaratë të Majlindës në të cilën ajo thotë: “Kam refuzuar milionat nga shtetet e tjera. Nuk ka para që më bëjnë të ndihem si sot”.
Për gazetën kosovare “Koha Ditore”, Kuka ka folur më shumë dhe ka lënë të kuptohet se shpërblimi për Majlindën duhet të jetë 1 milion euro. “Majlinda realisht ka refuzuar milionat e shteteve të tjera për të qëndruar në Kosovë dhe për të vazhduar të garojë për Kosovën. Është momenti që kjo të vlerësohet. Çdo medalist i artë olimpik bëhet milioner. Majlinda e meriton këtë”, ka thënë trajneri.
“Titulli i Majlindës është një arritje e jashtëzakonshme. Është diçka që bën histori, ka bërë që e gjithë bota të kthejë sytë nga Kosova”, vazhdon Kuka. Ai ka përmendur rastin e xhudistit rus Mansur Isaev që për medaljen e artë olimpike të fituar në Londër u shpërblye me 1 milion dollarë. Në fakt, ishin sukseset e Majlinda Kelmendit dhe xhudisteve të tjera që ndikuan të ndryshonin rregulloren për shpërblimin e sportistëve që arrijnë suksese në gara të mëdha ndërkombëtare.
