Biznesmeni nga Elbasani, Fatmir Kuçi është arrestuar nga Policia pasi dyshohet se ka aksidentuar rëndë pushuesin rus dje në plazhin midis Himarës dhe Livadhit.
Sipas një njoftimi për mediat, Policia thotë se Kuçi ka aksidentuar nga pakujdesia shtetasin rus dje në orën 11:00, duke i prerë edhe një gjymtyrë.
Ndërkohë në dëshminë e dhënë në polici e 44-vjeçarit, Fatmir Kuçi, i cili akuzohet se ka aksidentuar për vdekje me një nga dy skafet e tij turistin rus dje në Himarë, biznesmeni nga Elbasani ka thënë se nuk e ka goditur ai Denis Kaiumov, por thjesht ka ndaluar për t’i dhënë ndihmë.
“Pashë një person që kërkonte ndihmë dhe shkova për ta ndihmuar. Ndodhej rreth 800 metra larg bregut”, ka thënë Kuçi.
NJOFTIMI I POLICISE
Policia ka arrestuar në flagrancë për “Vrasje nga pakujdesia”, shtetasin: · Fatmir Kuçi, 44 vjeç, banues në Elbasan.
Shërbimet e Policisë kanë bërë arrestimin e Fatmir Kuçi-t, pasi ditën e djeshme rreth orës 11:00 në zonën bregdetare të quajtur “Livadh” i Himarës, ky shtetas duke drejtuar mjetin lundrues tip skaf-plastik me mbishkrimin “Black Arrow”, dyshohet se ka dëmtuar aksidentalisht shtetasin Rus D.K., i cili ka gjetur vdekjen për shkak të plagëve të marra, në spitalin e Himarës.
Policia ka sekuestruar dhe konfiskuar 2 mjete lundruese në përdorim dhe në pronësi të Kuçi-t : – mjetin lundrues skaf-plastik me mbishkrimin “Black Arrow”, 11.73 m i gjatë dhe 3.20 m i gjërë, me 3 motorë – 275 KF secili. – mjeti lundrues motor-deti me emrin “Viktoria-3”, pa dokumentacion përkatës.
