Turqia vjen me një kërkesë të përsëritur dhe të fortë për Shqipërinë: Mbylljen e kolegjeve turke. Ato janë shkollat më të kërkuara në vendin tonë që veprojnë prej disa vitesh në fushën e dijes. Në kolegjet turke mësojnë fëmijët e disa politikanëve shqiptarë, por jo vetëm, edhe fëmijë të biznesmenëve dhe njerëzve të tjerë me influencë në vend. Ato njihen si shkolla me pagesa të larta, por që nxënësit e mirë i stimulojnë me bursa.
Rreth një vit më parë, kur Presidenti turk Recep Tayyip Erdogan vizitoi Tiranën, ndër të tjera i kërkoi Kryeministrit Edi Rama të mbyllte kolegjet turke. Asgjë nuk ndodhi në fakt edhe pse kërkesa u bë nga një “mik” siç është shprehur disa herë Rama për Erdoganin dhe anasjelltas.
Tani, kur Turqia pësoi një tentativë për grusht shteti dhe për këtë fajëson armikun më të madh të Erdogan, Fethullah Gulen, kërkesa vjen e përsëritur nga ambasadori i Turqisë në vendin tonë. Në një intervistë që ka dhënë për News 24, ambasadori Hidayet Bayraktar u shpreh se: “për çështjen e shkollave në varësi të organizatës terroriste Gylen në Shqipëri po vazhdojnë bisedimet midis institucioneve më të larta të të dy
vendeve”, duke shtuar se “ndjeshmërinë tonë (turke) ndaj organizatës terroriste Gylen do të vazhdojmë t’ua përcjellim bashkëbiseduesve të çdo niveli në vendet mike, përfshirë Shqipërinë”.
Por kush janë shkollat në fjalë që financohen nga kleriku Gylen:
Medresetë e ndryshme në Kavajë, Elbasan, Tiranë, Korçë dhe Berat, që janë të ngjashme me shkollat “imamhatip” në Turqi.
Përveç medreseve, janë fondacioni i edukimit “Gylistan” dhe fondacioni i Edukimit “Sema”, si edhe kolegjet “Turgut Ozal”, “Mehmet Akif” dhe “Hasan Riza Pasha” të shtrira në Tiranë, Durrës e Shkodër.
Sa i përket shkollës “Memorial International School of Tirana” (MIST), ajo është shkolla më e shtrenjtë e vendit dhe i dedikohet një klase më të lartë të shoqërisë, madje mësojnë kryesisht fëmijët e diplomatëve.
Po kështu janë dhe dy universitete: “Epoka” dhe “Bedër”.
/Opinion.al
