Ministri i Financave, Arben Ahmetaj, tha dje se thellimi i reformave ekonomike dhe shmangia e incidenteve politike garanton rritjen e ekonomisë 4 për qind në 2017. Kreu i Financave, Ahmetaj, në konferencën e djeshme për shtyp foli për treguesit e ekonomisë në 6-mujorin e parë të vitit, duke vlerësuar se ekonomia shqiptare garanton cikël të pakthyeshëm afatgjatë të zhvillimit.
“INSTAT ka publikuar rritjen ekonomike të tremujorit të parë 2016, e cila dha indikacionin e parë të fortë të konsoliduar se ne kemi mundësi që këtë vit të kapim 3.4%, unë besoj që ndoshta edhe pak më shumë se kaq. I kemi të gjitha gjasat të kalojmë përtej 3.4% rritje ekonomike në vitin 2016, unë jam shumë optimist që gjërat do të jenë kështu siç janë sot. Pa aksidente politike lokale, rajonale dhe globale, ekonomia shqiptare do ta kapërcejë rritjen ekonomike 3.4% në vitin 2016 dhe patjetër gjasat janë që 2017 të jetë një vit akoma më i mirë ekonomik me 4%”, u shpreh Ahmetaj.
TË ARDHURAT
Ministri i Financave, Arben Ahmetaj, tha dje se në administrata tatimore dhe doganore ka arkëtuar 150 milionë dollarë më shumë të ardhura krahasuar me një vit më parë.
“Administrata fiskale ka performuar shumë mirë krahasuar me vitin e kaluar. Kemi realizim shumë domethënës të të ardhurave në gjashtëmujorin e parë prej 198 miliardë lekësh dhe akoma jemi në një debat statistikor për rreth 500 milionë të ardhura që mund t’i shtohen kësaj shifre, e gjithsesi shifra aktuale është shumë më e përmirësuar sesa viti i kaluar. Janë gati 150 milionë dollarë më shumë të ardhura se viti i kaluar dhe këtu dua të nënvizoj se pothuajse nuk ka fare dividend dhe ka shumë pak të ardhura nga burimet e tjera jotatimore”, tha Ahmetaj.
PAPUNËSIA
Ministri i Financave, Ahmetaj, tha se në 6 muajt e parë të 2016-s, papunësia është ulur për shkak të formalizimit të ekonomisë.
“Papunësia është debat politik dhe ashtu duhet të jetë. Forcat politike, kur janë të maturuara dhe të shëndetshme, e bëjnë debatin e papunësisë, duke iu referuar shkaqeve dhe pastaj reformave strukturore për ta ulur. Fakti tregon që papunësia është duke u ulur për shkak të zgjerimit të punësimit, megjithëse forcat e punës janë rritur. Që do të thotë se terreni ekonomik njeh hapje të vendeve të reja të punës dhe patjetër edhe të formalizimit. Është ulur po kështu edhe numri i të papunëve të dekurajuar, pra atyre të papunëve që refuzojnë të kërkojnë punë se kanë humbur shpresën. Të gjitha këto shifra, dua ta theksoj, konfirmojnë që ekonomia shqiptare ka hyrë në fazën e dytë të zhvillimit brenda mandatit të parë të kësaj qeverie. Pra, ka lënë mbrapa krizën”, u shpreh Ahmetaj./Panorama
