Ambasadori i Shteteve të Bashkuara të Amerikës Donald Lu ka takuar sot ish-kryeparlamentaren Jozefina Topalli, me të cilën ka diskutuar për reformën në drejtësi.
Takimi Lu-Topalli vjen një javë para votimit në Parlament të draftit me ndryshimet kushtetuese. Gjatë ditëve të fundit, ambasadori Lu ka intensifikuar takimet me deputetë të Partisë Demokratike, të cilët kërkon t’i bindë për të votuar reformën, raporton syri.net.
Kryetari i demokratëve Lulzim Basha ka deklaruar se nuk do të ketë asnjë votë të opozitës për mazhorancën, nëse arrihet konsensus mes palëve. Kjo ka bërë që ambasadori amerikan të takojë një nga një deputetë të PD, për t’i bindur të votojnë dhe mos t’i binden vendimeve të grupit parlamentar.
Por, pavarësisht të gjithave, PD ka qëndruar e vendosur në kërkesën e saj për vetingun, duke kërkuar konsensus për këtë pikë. Mbrëmjen e sotme, Kryeministri Rama u tërhoq dhe deklaroi se PD mund të bëjë çfarëdo propozim, mjafton të ketë aprovimin e SHBA-BE dhe mazhoranca do ta votojë. Të enjten e ardhshme pritet që të votohet në Parlament drafti me ndryshimet kushtetuese të reformës në drejtësi.
