Jurgen Molla, Arif Çiço dhe shtetasi turk Abubekir Tuncdemir kanë bërë tratativa për arritjen e një marrëveshjeje për trafikimin e një sasie heroine.
Tuncdemir kishte arritur të trafikonte 15 kilogramë heroinë nga Turqia për në Greqi. Pasi ka arritur ta sillte këtë sasi heroine në Selanik, shtetasi turk është lidhur me biznesmenin Jurgen Molla, për të realizuar transportimin e lëndës narkotike drejt Athinës.
Jurgen Molla ka kërkuar ndihmën e Shyqyri Kotorrit, i cili, sipas Prokurorisë, dyshohet se ka pasur rrjetin e tij të
trafikimit, transportimit dhe shpërndarjes së lëndës narkotike në Greqi. Në këtë kohë, Prokuroria ka kryer
përgjime të personave të dyshuar, ku në një prej mesazheve të zbardhura Jurgen Molla i shkruan Arif Çiços:
“O vëlla unë kam një muaj e ca që jam duke pritur. Isha në borxh, më fute në borxh, për një javë e asgjë që ta
nis burrin e huaj në Greqi kot të rri atje, jo sot jo nesër, ne i patëm ndryshe muhabetet. Ti sheh vetëm hallet e
tua. Se më fut mua në borxh e në siklete, po e shoh që nuk të bëhet vonë vëlla”.
Pas këtij mesazhi, Arif Çiço i kthen përgjigjen: “Vëlla më ço numrin dhe një emër kod, si ta thërrasin që ta di që
është ai”. Më pas, Jurgen Molla ka biseduar me Shyqyri Kotorrin, duke i kërkuar një njeri në Greqi, që mund të
bëjë transportin për llogari të Jurgenit, në adresën e dërguar nga Arifi.
Një ditë më pas, Jurgen Molla i shkruan mesazh Shyqyri Kotorrit (biznesmen ndërtimi që merret me beton): “O
shok po gjete dikë ka mundësi të marr më shumë beton (dyshohet se “betoni” është fjala kod për heroinë) sesa folëm, se sapo më njoftuan”. Një ditë më pas, më 12 shtator 2015, sërish Jurgen Molla i dërgon një tjetër
mesazh: “Hë vlla, mbërriti betoni? Se po presin punëtorët”.
Edhe kjo ngarkesë është kapur nga policia greke, duke qenë se gjithçka ishte në përgjim. Më 21 dhjetor të vitit
2015, Policia greke ka arrestuar 8 pjesëtarë të grupit të Shyqyri Kotorrit, mes tyre dhe vëllain e tij, Edmond
Kotorri, të cilëve iu gjet kokainë, heroinë dhe kanabis.
