Ministri i Transporteve dhe Infrastrukturës, Edmond Haxhinasto është pyetur në lidhje me grabitjen e datës së 30 qershorit në aeroportin e Rinasit, ku pretendohet se janë vjedhur rreth 1 milion euro.
Haxhinasto theksoi se procesi është në hetim dhe ai do të zbulojë përgjegjësitë që kanë institucionet përkatëse.
“Ministria e Punëve të Brendshme ka thënë që jemi në proces hetimi. Procesi i hetimit do shikojë gjithë përgjegjësitë institucionale. Hetimi do zbulojë gjithë faktorët që lidhen me sigurinë në aeroport. Pas hetimeve përgjegjësit do përgjigjen sipas detyrave funksionale. Secili të thellohet çfarë detyrash ka pasur dhe nëse i ka kryer apo jo ato”, tha Haxhinasto.
Mësohet se Prokuroria ka zgjeruar rrethin e hetimeve duke përfshirë edhe institucionet, të cilat kanë patur dijeni për problemtatikën në aeroport, por nuk kanë marrë masat e duhura.
Mirëpo, sa herë i bie fjala te parat, e kryesisht kur ato janë vjedhur si me magji, ministri Haxhinasto gjen kohën për të thënë dy fjalë të thjeshta.
E thënë kjo, pasi i njëjti ministër, nuk indinjoi të hedhë dy fjalë si të lartpërmendurat, për humbjen e dy jetëve në aksin rrugor Rogozhinë-Kavajë.
Sigurisht, aty nuk humben para, por humbën përgjithmonë nga jeta dy fëmijë të mitur, në lule të moshës. Ministri Haxhinasto nuk gjeti arsyen të thotë diçka, siç bëri sot, sepse në atë rast, nuk kishte nevojë për hetime, se përgjegjësia institucionale dihej mjaft qartë se kush e kishte dhe nuk ishte nevoja për thellim, për të parë nëse janë kryer apo jo detyrat përkatëse.
