Grabitja spektakolare që ndodhi mesditën e sotme në aeroportin e Rinasit ka ndezur debatin se kush është përgjegjës për perimetrin e sigurisë.
Tirana International Airport ka detyrimin e ofrimit të sigurisë së shërbimeve në aeroportin e Rinasit. Si në çdo aeroport tjetër civil në Europë e më gjërë, konçesionari që e ka nën menaxhim shërbimet në aeroport, ka detyrimin e ofrimit të sigurisë së shërbimeve në të, për avionët, pasagjerët dhe bagazhet.
TIA, ka ndërtuar sistemin e sigurisë duke e ndarë në dy segmente, sigurinë e ambjenteve të brendshme dhe skanerave, si dhe sigurinë e jashtme të aeroportit.
TIA ka përzgjedhur për sigurinë e brendshme të aeroportit kompaninë ICTS e huaj. Ndërkohë po TIA ka përzgjedhur për sigurinë e jashtme të aeroportit kompaninë Nazeri shpk.
Pra si rojet e portës së aeroportit dhe rojet e makinës së blinduar që ndodhej në pistë pranë avionit, e mbushur me para, ishin punonjës të kompanisë Nazeri shpk.
Ndërkohë, të gjithë aeroportet që menaxhohen kështu- në mënyrë civile dhe për sigurinë, auditohen nga një autoritet shtetëror, Autoriteti i Aviacionit Civil.
Ky autoritet duhet të auditojë aeroportin të paktën dy here në vit.
Por siç po kuptohet, në të gjitha kompanitë private të ruajtjes fizike të objekteve, në 18 muajt e fundit, kanë ndodhur tre grabitje spektakolare.
Pikërisht kjo gjë, na lejon të mendojmë se shërbimi i ruajtjes fizike, i zotëruar nga privatët, duket tërësisht i kriminalizuar dhe në mënyrë të përsëritur pjesë e grabitjeve kriminale të rënda, për shkak të shumave të mëdha të grabitura në çdo rast.
