Premier League ka dalë me forcë në krah të votës pro qëndrimit brenda Bashkimit Europian. Thirrjet, mbi të gjitha ajo e David Beckham, nuk kanë funksionuar. Populli i Britanisë së Madhe ka zgjedhur: BREXIT (Britain Exit – Dalja e Britanisë). Po tani çfarë do të ndodhë për sa i takon futbollit? Si ndryshojnë skenarët që kanë lidhje me futbollistët që nuk kanë një pasaportë evropiane, për merkaton, për fuqinë blerëse të klubeve angleze? Kjo analizë është më e komplikuar nga sa mund të mendohet dhe prek shumë aspekte.
Pasoja e parë e rezultatit të këtij votimi ka qenë zhvlerësimi i sterlinës, veçanërisht kundrejt dollarit më shumë sesa kundër euros. Kjo do të thotë se për klubet e Premier League do të jetë më e vështirë të sigurojë yjet, sepse çmimi për klubet angleze do të jetë më i shtrenjtë. Për shembull, çmimi i Pogba mund të rritet nga 120 milionë euro në 160 milionë. Një rritje kjo që vlen vetëm për klubet e Britanisë së Madhe. I njëjti diskutim vlen edhe për rrogat e lojtarëve të kontinentit të vjetër, nëse negociatat bëhen në euro dhe jo në sterlina. Në të njëjtën mënyrë, mund të jetë një zgjidhje ekonomikisht më e mirë për klubet e Europës që të bëjnë merkato në Premier League.
Për moment, rreth 65% e lojtarëve të Premier League vijnë nga jashtë Britanisë dhe, për momentin, klubet angleze janë të lira të marrin në ekip lojtarë që kanë pasaportë evropiane për shkak të ligjeve mbi lëvizjen e lirë të punëtorëve. Por tani “Brexit” hap skenarë të tjerë: – Rasti më i mirë për Premier League është që Britani e Madhe të rinovojë marrëveshjet me Bashkimin Europian për sa i takon lëvizjes së lirë të punëtorëve. Në këtë rast asgjë nuk do të ndryshonte. – Rasti më i keq është që të gjithë lojtarët evropiane të konsiderohen jo komunitarë. Në këtë mënyrë do të aplikoheshin për ata të njëjtat rregulla që sot aplikohen nga klubet angleze për lojtarët jo komunitarë, ose më saktë: për të luajtur në Premier League dhe për të marrë një leje pune, lojtari duhet të ketë zhvilluar 75% të ndeshjeve me kombëtaren e tij në 2 vitet e fundit.
