Pas skandalit të dhunës fizike ndaj një fëmije në një kopsht privat të Tiranës, reagimi i Ministres së Arsimit Lindita Nikolla, ndoshta nuk ka qenë ai që pritej dhe aq i shpejtë sa pritej. Sidoqoftë për herë të parë gjatë ditës së sotme Ministrja Nikolla ka folur për rastin, por para se të merrte përgjegjësitë ligjore të institucionit të saj që ka liccensuar kopshtin në fjalë, u ka bërë thirrje prindërve të kenë kujdes, se ku i dërgojnë fëmijët.
“Është një rast i paprecedentë dhe Anjeza Shabani duhet të marrë dënimin e merituar”, tha Nikolla. “U bëj thirrje të gjithë aktorëve që të denoncojnë raste të tilla nëse ka. Gjithashtu, u bëj thirrje edhe prindërve që të kenë kujdes se ku i dërgojnë fëmijët. Ne inspektime kemi kryer, por ka edhe shumë kopshte informale të fshehura në apartamente pallatesh të cilat nuk mund t’i identifikojmë të gjithë, ndaj duhet ndihma edhe e juaj si media”, tha Nikolla, duke mos pranuar asnjë përgjegjësi të institucionit që ajo drejton.
Edhe pse kjo nuk është hera e parë që denoncohet dhuna ndaj fëmijëve në institucionet arsimore, duket se asnjë masë konkrete nuk ekziston për parandalimin e këtij fenomeni.
