International Balkan Tatto Show, që po zhvillohet aktualisht në Tiranë, ka sjellë në kryeqytet artistë tatuatorë nga e gjithë bota, në një event që përgjatë tri ditëve po ofron një shfaqje dhe krejt të pazakontë.
Në ambjentet e Pallatit të Sportit “Asllan Rusi”, nga dita e premte deri të dielën janë vendosur artistë të njohur tatuazhesh, të cilët performojnë në stendat specifike, krijimet e tyre mbi lëkurë.
Eventi është i shoqëruar me elementë të spikatur show, ku personazhe të njohur në botë e madje edhe mbajtës të rekordeve Guinness, do të sjellin shfaqje ekstreme të rralla dhe të panjohura për publikun shqiptar.
Teksa shijojnë një birrë apo realizojnë një tatuazh tek artisti që zgjedhin vetë, vizitorët e këtij eventi kanë gjithashtu mundësinë të korrigjojnë apo fshijnë tatuazhet e gabuara, pranë stendës së klinikës KEIT, e cila e ofron këtë mundësi përmes pajisjes së laserit.
Në një pasdite të freskët, brenda Pallatit të Sportit, në led wallet e vendosura, tifozët mund të ndjekin edhe ndeshjet e kampionatit Europian.
Balkan International Tatto Show, qëndron e hapur, nga ora 10:00 – 22:00.
