Tre zyrtarë të Njësisë Administrative në Gjegjan të Elbasanit, janë arrestuar nga policia, me urdhër të prokurorisë. Organi i akuzës ka zbuluar në këtë njësi vendore se është bërë një dëm prej 35 milionë lekë. Gjithashtu, për 5 zyrtarë të tjerë, është vendosur masa e sigurimit “Detyrim paraqitje”.
Nga hetimet ka rezultuar se zyrtarët e ish-komunës Gjegjan (5 prej tyre: tre të arrestuar 2 në kërkim), aktualisht Njësi Administrative, përfshirë edhe titullaren e njësisë, kanë kryer veprime fiktive në të paktën dy procedura prokurimi, duke përvetësuar tërësisht shumë e parave të caktuara për ndërtimin e një landfilli mbeturinash në zonë, si edhe të pyllëzimit të një sipërfaqe 50 hektarë me pemë Shegë.
Hetimet kanë treguar se nga ish-komuna Gjegjan është prokuruar fondi 1.250.000 lekë për ndërtimin e landifillit të mbeturinave në këtë zonë, në vitin 2014. Ky punim duhej të mbyllej brenda vitit. Aktualisht, nga veprimet hetimore të Prokurorisë, rezulton se landifilli jo vetëm që nuk është ndërtuar, por e gjithë zona është e rrethuar dhe përdoret nga një subjekt privat. Ndërkohë, në dokumentet e ish-komunës Gjegjan dhe aktualisht Njësia Administrative Gjegjan, rezulton që landfilli është përfunduar dhe vënë në punë. Për këtë prokurim fiktiv është bërë edhe pagesa, pavarësisht se puna nuk është kryer.
Po në vitin 2014, ish-komuna Gjegjan ka realizuar prokurimin publik për pyllëzimin të 50 hektarë tokë bujqësore me pemën Shegë, me vlerë 32.5 milionë lekë të reja. Sipas parashikimit, pemët këtë vit duhej të nisnin të jepnin prodhimet e para. Ndërkohë, nga këqyrja në terren, rezulton se në hapësirën bujqësore të prokuruar, nuk rezulton thuajse asnjë pemë shegë. Po për këtë prokurim, shuma e parashikuar rezulton e paguar e gjitha.
Zyrtarët
Lumturi Hoxha, Administratore e Njësisë Gjegjan (ish-kryetare e Komunës Gjegjan), shpallur në kërkim
Ylli Ago, punonjës i Njësisë Administrative Gjegjan, arrestuar
Bardhyr Sharra, punonjës i Njësisë Administrative Gjegjan, shpallur në kërkim
Fatmir Lamçja, punonjës i Njësisë Administrative Gjegjan, arrestuar
Rexhep Hoxha, punonjës i Njësisë Administrative Gjegjan, arrestuar.
