Mijëra qytetarë kanë nisur pelegrinazhin drejt kishës së Shna Ndout e njohur ndryshe si kisha e Laçit në kërkim të mbarësisë, në ditën që kremtohet festa e kësaj kishe.
Me qirinj në duar kanë ngjitur shkallët që nisin në krye të qytetit të Laçit dhe që të çojnë drejt vendit të shenjtë duke përshkuar njëri pas tjetrit rrugën dhe duke uruar njeri tjetrin me fjalët “u ndihmoftë”.
Fëmijë, të rinj burra, gra e të moshuar po presin të kalojnë gjithë natën në ambientet përreth kishës duke u lutur dhe shprehur dëshira me shpresën për realizim.
Nata Shna Ndout është me 12 qershor ku mijëra besimtarë presin që të vijë data 13 që është dita e Shna Ndout.
E veçanta e kësaj kishe në dallim nga festa të tjera në vende të shenjta është fakti se drejt saj nuk ngjiten, luten dhe shprehin dëshira vetëm besimtarët katolikë por edhe qytetarë të besimeve të ndryshme, duke u veçuar si një kishë që për qytetarët i kapërcen kufijtë fetarë.
Në këtë natë të madhe njerëz nga qytete të ndryshme të vendit por edhe nga shtetet fqinje dhe pelegrinë të të gjitha feve kaluan natën në vendin më të shenjtë në Shqipëri.
Vendi i shenjtë i Shna Ndout është bërë vendi i unifikimit të besimeve dhe besimtarëve, të cilët pa dallim feje besojnë në mrekullitë e njërit nga Shenjtët me të njohur jo vetëm në Shqipëri por edhe në mbarë Europën.
Një rrugë vërtetë e gjatë, e lartë dhe me shkallë të lodhshme por askush nuk ankohet, të gjithë pasi mbërrijnë në krye shprehen se është rruga e mrekullive, e shpresës dhe ndihmës së pritur nga shenjti dhe askush nuk ndien lodhje… përveçse harmoni.
Rituali i 13 të martave
Peleginazhi i shenjtë i besimtarëvë të feve të ndryshme fillon në mes të muajit mars, që është e marta e parë e pelegrinazhit në shenjtoren e Shna Ndout dhe përfundon në 13 qershor që është dhe festa e këtij shenjti. Për 13të të marta, besimtarë të shumtë të të gjitha feve, me qirinj në duar dhe me lutje të veçanta sfidojnë fatin e tyre, duke besuar në mrekullitë e Shna Ndout. Rituali i shenjtores fillon sapo kalon qytetin e Laçit dhe fillon ngjitjen në mal. Ndalesa e parë bëhet tek gjurmët që është dhe vendi ku mendohet se ka kaluar Shna Ndou. Në gurë janë shenjat e këmbëve dhe të duarve të tij, gjithashtu vendi ku mendohet se ai ka pushuar. Të gjithë besimtarët përshkojnë këto pjesë të shenjta të pelegrinazhit me prekje dhe vendosje të kokës, duarve dhe komplet trupit në vendin për të cilin mendohet se ka kaluar Shna Ndou.
