Kryetari i Partisë Demokratike, Lulzim Basha, do të takohet sot me kryetarin e Kuvendit, Ilir Meta, për Reformën në Drejtësi.
Burime nga Partia Demokratike thanë mbrëmë se kryetari i Kuvendit, i cili do të shoqërohet nga shefi i kabinetit Sokol Dervishaj, do të takohet në orën 11:00 në hotel “Rogner”, me kryetarin e PDsë, Lulzim Basha, i cili do të shoqërohet nga nënkryetari i Komisionit të posaçëm të Reformës në Drejtësi, Oerd Bylykbashi.
Burime pranë kryeparlamentarit thënë se Meta ka marrë një telefonatë nga eurodeputeti Eduard Kukan, i cili ka mbështetur dhe vlerësuar iniciativën e tij për të ftuar në një takim kreun e opozitës, ku të diskutojnë çështjet që nuk kanë gjetur zgjidhje për Reformën në Drejtesi.
Letra
Dy ditë më parë, përmes një konference për gazetarët, kryetari i Kuvendit Ilir Meta bëri publike letrën që i kishte dërguar kryetarit të Partisë Demokratike, Lulzim Basha, në një përpjekje për të diskutuar hapur me të për ato çështje për të cilat mund të ketë reflektim. “Takimi midis meje dhe z. Basha është kërkuar nga ana ime si një takim zyrtar, që do të thotë se nuk është një takim informal, dhe e nënvizoj edhe një herë tjetër, jam shumë fleksibël për gjithçka që ka të bëjë me vendin e takimit, që ka të bëjë me formatin e takimit dhe me çdo element tjetër, por nuk jam shumë fleksibël te koha.
Pra, jam fleksibël për t’u takuar në çdo moment, duke filluar nga tani e në çdo kohë, por mundësisht deri të hënën. Sepse, përndryshe, mund të komprometojmë procedurat parlamentare dhe integritetin e Kuvendit. Sepse kemi një Kushtetutë mbi të cilën funksionon Kuvendi dhe për më tepër, kur bëhet fjalë për ndryshimet kushtetuese. Kemi edhe një Rregullore të miratuar me konsensus.
Takimi do të jetë zyrtar, edhe qëndrimi im pas takimit do të jetë zyrtar”, u shpreh Meta. Sipas tij, takimi është një tentativë për të gjetur një zgjidhje me legjitimitet dhe integritet për Reformën në Drejtësi. “Shpresoj që të jetë një takim i dobishëm, ashtu sikurse jam i hapur dhe këtë e kam theksuar prej kohësh, për çdo takim të të gjithë aktorëve të përfshirë prej kohësh në këtë proces, për të verifikuar përfundimisht qëndrimin e secilit dhe për t’i dhënë një zgjidhje me cilësi, integritet e legjitimitet kësaj reforme që kërkojnë të gjithë qytetarët shqiptarë, që e kërkon edhe e ardhmja europiane e Shqipërisë”, u shpreh Meta.
Ftesa e Metës për takim vjen pas dështimit të takimit të Kryeministrit Rama me kreun e PDsë Basha për Reformën në Drejtësi dhe pas deklaratave të kreut të qeverisë në Kuvend se Reforma në Drejtësi do të votohet, me ose pa opozitën, dhe me çdo çmim. /Panorama
