Pak para takimit me liderin e opozitës Lulzim Basha, kryeministri Edi Rama u shpreh se shumica pranon propozimin e opozitës për votimin me 2/3 të paketës kushtetuese të reformës në drejtësi.
Premtimi u bë në Kongresin e PDIU-së ku ishte i ftuar, vetëm dy ditë para se të takohet me kundërshtarin e tij politik Lulzim Basha për këtë çështje.
Rama tha se java e ardhshme është java e të vërtetës, ndërsa bëri të qartë edhe njëherë dy pika ku nuk mund të negociohet me opozitën.
“Kemi mbështet reformën në drejtësi, për të cilën dy fjalë kam meqë Shpëtimi mu referua . Ne, unë personalisht së bashku me kryetarin e LSI kemi bërë çdo përpjekje dhe kemi testuar, unë më shumë se Iliri, se Iliri durimin e ka armën e vet më të fortë, unë nuk jam aq i durueshëm por këtë herë kam mësuar që duroj tej çdo durimi, për të krijuar kushtet që kjo reformë të votohet nga të gjithë.
Kemi qenë dhe jemi të gatshëm për të gjithë kompromiset por me dy kushte: E para nuk ka kompromis mbi shtyllën themelore të reformës që është hedhja në erë e sistemit të korruptuar që mban bashkë gjykatës dhe prokurorë që nuk duhet të hetojnë dhe gjykojnë të tjerët, por duhet të hetohen dhe gjykohen nga drejtësia, raporton express.
Dhe kjo e garantuar përmes një skanimi me kontroll ndërkombëtar të pasurisë, karrierës, vendimmarrjeve dhe aftësive. Vetëm pasi të kalojnë këtë test me standardet më të larta ndërkombëtare le të ulen nëpër punë dhe le të hetojnë dhe gjykojnë të tjerët. Kjo nuk negociohet. Ana tjetër, nuk negociohet ngrehina e sistemit, është një sistem i ri që do ngrihet mbi sistemin e vjetër që reforma do ta shembë sepse ky është vullneti i më shumë se 90% të shqiptarëve. Nuk kemi asnjë problem ne, duan 2/3, 2/3 le ti marrin. Nuk na intereson fare kjo pjesë. Duan të jenë dhe ata pjesë se kanë bërë një kusht, duhen votuar kandidaturat nga Parlamenti me 2/3 sa të jetë gjallë Edi Rama.
Nuk ka problem. Nuk mund tu premtoj se do vdes kur të duan ata, por mund tu premtoj se deri sa të jem gjallë me 2/3, por një gjë po u them, e kam thënë disa herë. Kam thënë që reforma mund të kalojë dhe mund të kalonte dhjetorin e kaluar, kam thënë që mund të kalojë në shkurt, mars, prill. Po ju them që java e ardhshme është java e të vërtetës dhe e gjithë shumica jonë, PS-LSI-PDIU mbështet pa asnjë ngurim draftin e dakordësuar me SHBA dhe BE”, theksoi Rama
