Nga Dritan Laci
Do të takohen të hënën dhe ky do të jetë takimi i parë pas 5 vitesh mungesë në nivelin më të lartë të skakierës politike në Shqipëri.
Kryeministri Rama dhe kryetari i Partisë Demokratike Lulzim Basha, me kërkesë të të parit, do të takohen në fillimin e javës së ardhshme në orën 17.00, për ti dhënë edhe një tjetër shans dialogut të mbetur në mes për Reformën në Drejtësi.
Kur dihet që edhe afati i lënë nga ndërkombëtarët për ta mbyllur këtë Reformë nga më madhoret e ndërrmara në vitet e fundit, është përfundimi i sesionit vjetor parlamentar që përkon me muajin korrik.
Por siç e shkruam më sipër ky nuk është takimi i parë i një rangu të tillë në politikën shqiptare, në 25 vitet e fundit,
Më 18 shkurt 1991, kryetari i Partisë Demokratike Sali Berisha, ngjiti shkallët e Presidiumit Popullor për tu takuar në orët e vona të ditës, me Presidentin e kohës, Ramiz Alia, me qëllim për ti dhënë zgjidhje grevës së urisë së studentëve, të ngujuar në një nga godinat e Qytetit Studenti.
Në qershor të po këtij viti kemi sërish bisedime të rangut të lartë për të krijuar Qeverinë e Stabilitetit e cila do të kryesohej nga kryeministri Ylli Bufi (11 qershor 1991- 6 dhjetor 1991)
Në 9 mars 1997, në kulmin e krizës së ardhur nga fajdet, Presidenti i kohës Sali Berisha, në mungesë të kryetarit të PS-së Fatos Nano i cili ndodhej në burg, u takua me Sekretarin e Përgjithshëm të Partisë Socialiste, Rexhep Mejdani, me qëllim bisedimin për krijimin e qeverisë e cila do të njihej si Qeveria e Pajtimit Kombëtar.
Më 23 dhjetor 1998, kryeministri socialist i kohës, Pandeli Majko mbajti një takim me kryetarin e Partisë Demokratike, Sali Berisha, me qëllim zgjidhjen e çështjes së grevës së urisë ku ishin futur studentët.
Masakra e Raçakut më 15 janar 1999, çoi edhe njëherë në një takim të rangut të lartë politik në Shqipëri, kryeministrin Pandeli Majko me kryetarin e Partisë Demokratike, Sali Berisha.
Në vitin 2002, kryeministri i kohës Fatos Nano dhe kryetari i Partisë Demokratike Sali Berisha takohen për të arritur një konsensus për zgjidhjen e Alfred Mojsiut President.
Në vitin 2010, kryeministri Berisha u takua me kryetarin e Partisë Socialiste, Edi Rama, në zyrën e Presidentit Topi, për hapjen e kutive zgjedhore.
Ndërsa në vitin 2012, Berisha dhe Rama u takuan edhe një herë për çështjen e Presidentit.
