Nëse shtrohet pyetja se cili është vendi më i korruptuar në botë, përgjigjia e parë që jepet bazohet në nivelin e korrupsionit të perceptuar. Zakonisht mendohet për vendet amerikano-latine, ato afrikane, apo edhe ballkanase. Por vendi më i korruptuar është Anglia.
Nuk bëhet fjalë për një korrupsion që ka të bëjë me administratorët publikë, policët, apo kryetarët e bashkive, por për një lloj korrupsioni që ushqen sistemin ekonomik të Anglisë. Dhe në të gjithë këtë, qeveria dhe qytetarët britanikë nuk e kanë kuptuar emergjencën që po kalon vendi.
Këto vlerësime janë dhënë nga gazetari i njohur Roberto Saviano në Parlamentin britanik, i thirrur nga deputeti laburist David Lammy pikërisht për të ekspozuar situatën.
Sipas gazetarit italian, “në Mbretërinë e Bashkuar llogaritet të pastrohen 57 miliardë stërlina në vit”. “Bursa City e Londrës, por edhe Wall Street, janë lavatriçet më të mëdha të parave që rrjedhin nga trafiku i drogës”, ka thënë Saviano, duke cituar studime të institucioneve si National Crime Agency, apo Transcrime.
Për shkak të shërbimeve që ofron, Londra është një sistem financiar ndërkombëtar ku kryhen transaksione nga e gjithë bota, me vlerë miliarda stërlina në vit. Por njëkohësisht, kryeqyteti anglez ndodhet në qendër të sistemit më të rëndësishëm “offshore” në botë.
Shumë kapitale ndërkombëtare që kalojnë përmes parajsave fiskale si ishujt Kajman, apo të tjera, kanalizohen më pas në bankat e Londrës dhe konsiderohen të pastra, pavarësisht se më parë kanë qenë para të pista që kanë ardhur nga trafiku i drogës.
Në vijim të raportimit të tij, Saviano ka vënë në dukje se, mafiet tradicionale italiane, por edhe ato ruse e të tjera që nuk kanë problem si të bëjnë para por se si t’i pastrojnë ato, kanë depërtuar në sistemin financiar britanik në heshtje.
“Nuk ka kufoma në rrugë, apo masakra. Në Meksikë apo Itali, mes kufomave, gjakut dhe konfiskimeve të drogës nuk mund të mos mendosh se mafia ekziston. Edhe në Londër ekziston, por është e heshtur, vepron nën hije. Nuk ka aromën e gjakut, por atë të sigurimit të parave”, ka thënë gazetari i njohur.
Rëndësinë e situatës duket se e ka kuptuar shtypi britanik. Një shkrim investigativ i “The Guardian” për grataçelën rezidenciale më të lartë të Londrës, St George Wharf Tower, tregon se shumica e apartamenteve zotërohen nga të huaj dhe qëndrojnë të boshatisur shumicën e kohës, ndërkohë që shumica e anglezëve nuk arrijnë të gjejnë shtëpi me qera të pranueshme.
Është një ndërtesë që ofron të gjitha shërbimet, por që nuk përdoret për t’u banuar dhe shërben më tepër si një kasafortë prej çementoje për të ruajtur paratë e investuara./T.CH
