Nuk kanë fund çudirat në Shqipëri, një vend që mbetet larg Europës me vite dritë, edhe për gjëra ku logjika duket e thjeshtë.
“Perla” e fundit vjen nga Korça, ku Drejtoria Vendore e Policisë Korçë ka publikuar planin e masave tê sigurisë për ndeshjen Skënderbeu-Partizani. Ndër të tjera, ka një sërë gjërash të ndaluara, ku natyrisht nuk mund të mos bjerë në sy ndalimi i çelsave e monedhave.
Nëse shkon në stadium me makinë dhe parkon aty afër, çelsin e kapërdin ose e fut në të mbathura, ose i bie shkurt, e hedh poshtë, se fundja asgjë nuk vjen para ndeshjes së madhe.
Edhe nëse je i vetëm në shtëpi dhe mbyll derën për të shkuar në stadium, çelsi duhet fshehur diku, ose shtëpia të mbetet hapur.
Por çudia më e madhe është një tjetër: ndalohet hyrja në stadium e çdo personi nën 14 vjeç! Edhe me babain, edhe me biletë, në stadium nuk hyn dot askush, as ata pa kartë identiteti që kanë fatin e keq të ngjajnë të vegjël ose kanë hequr mjekrën para ndeshjes.
Në gjithë botën urojnë që të shkojnë sa më shumë familje, femra e fëmijë në stadium, por me sa duket fëmijët në Korçë qenkan huliganë të frikshëm.
Për fat, nuk do të lejohen këta kriminela të rrezikshëm dhe ndeshja e vitit do të jetë një spektakël vetëm për të rritur, a thua se është film porno…
