Nga Dritan Laci
Ka tri ditë që i vetmi lajm politik që qarkullon në këtë dynjanë tonë të shtuar të fakirëve, është a u vodhën apo s’u vodhën kutitë e votimit në zgjedhjet e Partisë Socialiste. A thua se ky është shqetësimi i fundit që do të na shpëtonte njëherë e mirë në këtë palo demokracinë tonë shqiptare.
Në fakt për ta bërë të qartë që në fillim dhe për tu bërë edhe paksa malinj, ky është një debat aq shterpë, sa jo demokraci nuk prodhon por edhe vetë shqiptarët, të cilëve u ka ardhur në majë të hundës me këtë farë politikanësh, as kanë për ta vënë ndonjeherë ujin në zjarr, nëse u vodhën apo jo socialistët midis veti.
Kjo sepse nëse do të ishin një popull që e ndjen në palcë demokracinë dhe vlerat e saj, do të ishin shqetësuar po kaq kur po këta politikanë ua kanë vjedhur po kaq ashiqare votën, ose më e keqja kanë bërë sehir sepse ashtu u interesonte, kur drejtuesit e tyre vidhnin votën popullit, si të majtë, të qendrës apo të djathtë.
E pra sot Blushi, Hafizi, Dade, Maqo me shokë, dhe shumë prej tyre që merakosen për demokracinë, nuk po bëjnë asgjë tjetër vetëm se po kafshojnë mbi trupin një viktime që e kanë vrarë po ata.
Ashtu si në një dramë të Brehtit, e cila luhej në pushtimin nazist, ku të gjithë heshtnin për fatin e komshinjve çifut, por ku harruan se një ditë ky fat kobzi do të trokiste edhe në derën e tyre, por atëherë do ishte shumë vonë, pasi nuk kishte mbetur më kush ti ndihmonte.
E pra sot nuk ka mbetur kush të bërtasë për fatin e Benit, Mozës, Artës, Maqos, sepse në një farë mënyre ata janë po aq fajtorë apo bashkëfajtorë në atë që kanë gatuar.
Atëherë përse duhet të merakosemi për demokracinë e familjes së Benit, Mozës, Artës, Maqos me shokë, nëse i pari i familjes, Rama, ua vjedh apo jo votën?!!
A nuk është vota ime e barabartë kur shkelet, vidhet, dhunohet, me atë të Benit, Mozës, Artës, Maqos me shokë.
Atëherë kujt i intereson i hapen apo jo kutitë Benit, Mozës, Artës, Maqos me shokë e të tjerë.
Do i japë kjo më shumë demokraci vendit?
Do i bëjë këta njerëz më të ndershëm, sa të mos u japin tenderat miqve, farefisit, fëmijëve të tyre?
Do na japë më shumë të ardhura në fund të muajit?
Do ndalojë nepotizmin në administratë?
Nëse ju nuk jeni të aftë të tregoni demokraci brenda familjes suaj, nëse ju vidhni votën brenda familjes suaj, nëse ju nuk jeni të aftë të mbroni votën brenda familjes suaj, atëherë ky nuk është më shqetësimi primar i shqiptarëve?
Pasi automakisht ata kanë përballë një familje që mund të ketë të njëjtë mungesë respekti për votën edhe të atyre që nuk votojnë për ta?
Nëse ju do të ishit të aftë të mbronit këto parime brenda familjes, do vlente një debat për demokracinë, por nëse ky është thjesht një konsum i brendshëm, brenda familjes, nga ato të rëndomtit ku fëmijët gërmojnë në xhepat e prindërve dhe tërheqin një 10 mijë lekësh pa dijeninë e tyre se duan të shkojnë në pub, dhe kjo përfundon me sherr e shamatë, kjo nuk u intereson fare shqiptarëve.
Madje nëse do ishin kaq malinj shqiptarët, përgjigjja që do u jepnin në një rast të tillë do të ishte: Ju po hani çorbën që keni gatuar dhe mundësisht mos na ngatërroni në sahanin tuaj…..
