Komando terroriste që kreu masakrën e Parisit më 13 nëntor dhe atë të Brukselit më 22 mars, kishte si objektiv të godiste Francën gjatë zhvillimit të kampionatit europian të futbollit Euro 2016.
Lajmi vjen nga e përditshmja franceze Libération, sipas së cilës, ky ka qenë rrëfimi i Mohamed Abrinit, terroristit të arrestuar të premten në komunën Anderleht në Bruksel. Abrini, i cili pranoi se ishte personi i tretë i njësisë që goditi aeroportin e Zaventemit, i njohur ndryshe si “burri me kapele”, rrëfeu se celula terroriste franko-belge kishte në shënjestër Francën e jo Belgjikën, por iu desh të improvizonin e të përshpejtonin sulmin, për shkak të avancimit të hetimeve nga prokuroria belge, çka solli edhe arrestimin e Salah Abdeslam.
Ndër të tjera, gazeta franceze shkruan se kompjuteri i njërit prej kamikazëve të 22 Marsit, që është në zotërim të prokurorëve belgë, është një minierë informacionesh.
Sipas Libération, aty ka dosje audio e regjistrime telefonatash me Sirinë, përmes së cilave organizoheshin me hollësi sulmet terroriste dhe caktoheshin shënjestrat. Një provë kjo që vërteton se celula terroriste kontrollohej direkt nga Siria dhe ishte aktive edhe pas vdekjes së Abdelhamid Abaud, i cilësuar si truri i grupit.
Zyrtarë të policisë franceze shprehen se këto detaje nuk përbëjnë surprizë për organet hetimore në Francë, por thjesht vërtetojnë faktin se Belgjika, është një çerdhe xhihadistësh, prej ku organizohen sulmet në Europë./Klan
