Ministri i Financave, Arben Ahmetaj zhvilloi takimet e para në Drejtorinë Rajonale të Tatimeve dhe Doganës në Tiranë ku kërkoi angazhimin maksimal të administratës fiskale për zbatimin e planit operacional dhe veçanërisht komunikimin dhe shërbimin me profesionalizëm ndaj tatimpaguesve.
Ndër të tjera, Ministri Ahmetaj kërkoi nga Drejtoria e Tatimeve të Tiranës të zhvillojë vizita fiskale në bizneset e zonës së ish-bllokut, të cilat sistemi i riskut në tatime i ka klasifikuar me risk të mesëm dhe të lartë.
Ai theksoi se nesër Blloku nuk njeh biznes të vogël, janë të gjithë biznes i madh sepse e vërtëta kjo është, dhe unë në fund të javës, dua t’i tregoj publikut shqiptar që ne e dimë shumë mirë se çfarë ndodh.
Megjithatë, ministri i Financave nuk është në dijeni se shumica e bizneseve në zonën e ish-Bllokut janë të regjistruara si biznes i madh. E mbi të gjitha, të regjistrohesh si biznes i tillë, nuk bëhesh dot me detyrim-përcaktim, por sipas xhiros të deklaruar.
Ndërsa, nëse paramendohet se bizneset kanë gënjyer për xhiron reale, ky nuk është problem për bizneset në fjalë, por mos efikasitet i kontrollit tatimor.
Ndërkaq, ministri Ahmetaj me deklaratën e ditës së sotme nuk ka bërë asgjë tjetër, veçse sa ka hedhur një shashkë, pasi, në asnjë vend të botës nuk përcaktohet vlerësimi sipas zonës, por sipas xhiros reale të subjektit në fjalë.
Sigurisht, taksat duhen mbledhur, qofshin ato të vogla apo të mëdha. Por e mira e gjithë kësaj pune është që mos të shpallet “armik” për evazion fiskal një zonë, kur dihet mjaft mirë, se ka biznese të tjera, në zona të tjera, me xhiro shumë herë më të lartë të regjistruar.
Kështuqë, zona pak vlerë ka, nëse nuk regjistrohet sakt dhe drejt xhiro reale e çdo subjekti.
Gjithsesi, problemi i arkëtimeve në tatime, sigurisht, nuk janë bizneset e zonës së ish-Bllokut, madje as lokalet e vogla. Por siç edhe u shpreh qartë dhe bukur kompania e konsulencës dhe trjanimit të mbledhjes së të ardhurave, Crown Agents është një kontrabandë e nivelit të lartë që nuk kapet dot përmes inspektimeve rastësore, por që duhet të luftohet nga agjencitë ligjzbatuese si sektori i krimit ekonomik në Policinë e Shtetit.
