A është takuar kryeministri shqiptar, Edi Rama me personin e përmendur në skandalin e Panama Papers, Ismail Mulletin dy muaj më parë në zyrën e tij?
Kjo është pyetja që portali, Syri.net i ka drejtuar kryeministrit Rama.
Nga burime konfidenciale të Syri.net bëhet me dije se kryeministri e ka takuar Ismail Mulletin pikërisht dy muaj më parë në zyrën e tij.
Portali aludon se qëllimi i këtij takimi duhet të ketë lidhje me shpërthimin e skandalit të Panama Papers, që pak kohë më pas nga takimi mes tyre, shpërthej në të gjithë botën, ku emri i Ismail Mulletit ishte një prej tyre.
“Ne duam të besojmë që Edi Rama nuk e ka ditur muaj më parë se bota do të tronditej nga ky skandal dhe emri i Ismail Mulletit do të figuronte në ato letra, por ama sot që ne gjendemi përballë faktit të kryer dhe petët e lakrorit janë hapur, sot Kryeministri i vendit ka detyrimin ligjor dhe moral të tregojë se përse ai është takuar me Ismail Mulletin disa muaj më parë”, shkruan Syri.net.
Ndërsa, thekson se kryeministri ende nuk ka mbajtur asnjë qëndrim rreth asaj çfarë është publikuar deri tani për Shqipërinë në ato letra, por nga ana tjetër, asqerët e tij ministra dhe ato në media kanë ditë që lëshojnë shashka të cilat as nuk plasin, e as nuk arrijnë të ngjallin reagim tek opinioni publik.
Më tej, Syri.net shkruan se evidentimi i faktit dhe vërvitja e emrit të Ismail Mulletit ishte aq e fortë, saqë, megjithë qëllimin e kundërt, emri i tij u rrokullis e përfundoi sërish në zyrën kryeministrore.
