Hetimet për rrëzimin e helikopterit të FA-ve dje në Grizhë të Shkodrës vazhdojnë ende. Deri më tani konstatohet se helikopteri është gjetur 200 metër nga bregu i Liqenit, në thellësi rreth 5 metra.
Fjala është për trupin kryesor të helikopterit (kabinën) pasi mjeti i fluturimit është copëtuar në pjesë të ndryshme që janë shpërndarë në ujë.
Dy viktimat nga këqyrja në vendngjarje rezulton se kanë qenë në ulëset e para. Në momentin e nxjerrjes së tyre nga kabina e helikopterit banorët e zonës thonë se kanë pasur vështirësi pasi pilotët ishin të mbërthyer me rripat e sigurimit.
Ata mendohet se kanë qëndruar në kabinë pasi janë përpjekur deri në momentin e fundit të manovronin mjetin fluturues për të shmangur përplasjen e tij me sipërfaqen e ujit.
I plagosuri
Ushtaraku i mbijetuar nga aksidenti i helikopterit duket se ka një histori më vete. Prokuroria konfirmon se ai është hedhur në liqen para se helikopteri të prekte ujin dhe të niste fundosjen.
Sipas dëshmive në vendin e ngjarjes dhe vendit ku është gjetur i mbijetuari Gerald Baramuca, rezulton se ai është hedhur nga kabina pasi ka hapur derën e madhe të pasme të mjetit fluturues të ushtrisë.
Hetuesit mendojnë se avioni ka pasur tronditje dhe humbje të ekuilibrit të drejtimit duke nisur të humbë lartësi, çka ka bërë që Baramuça të hidhej jashtë nga kabina.
Në këtë mënyrë shpjegohet edhe fakti se ai ka arritur të mbijetojë pasi nuk ka qenë brenda në kabinë në momentin e përplasjes së helikopterit me sipërfaqen e ujit.
Pasi ka notuar vetë për disa metra, i mbijetuari është ndihmuar nga peshkatarët që ndodheshin në vendngjarje me varke të cilët kanë njoftuar më pas edhe policinë.
Nga ana tjetër, ushtaraku nuk është marrë në pyetje ende pasi grupit të hetimit i është thënë nga stafi i spitalit se “i plagosuri është në pamundësi shëndetësore”.
Hetimi
Prokuroria dhe policia kane urdhëruar nisjen e procedurave për nxjerrjen e trupit të avionit nga thellësia e liqenit me qëllim këqyrjen e grupit të komandimit të mjetit dhe kutinë e zezë.
Po kështu grupi i hetimit ka vendosur thirrjen e një grupi ekspertësh të ushtrisë dhe aviacionit me qëllim kryerjen e ekspertizës teknike në lidhje me defektin që ka sjellë rrëzimin e avionit.
Nga Shtabi i FA, regjimenti i helikopterëve Farkë, komanda e Forcës Ajrore dhe Kulla e Rinasit janë kërkuar informacione të hollësishme që kanë të bëjnë me itinerarin dhe planin e fluturimit, trajnimin e personave që ishin në bordin e mjetit, dokumentacionin për kontrollin e fundit të mjetit fluturues dhe gjithë komunikimet që kulla e Farkës dhe e Rinasit kanë pasur me mjetin fluturues të ushtrisë nga momenti i ngritjes në fluturim e deri tek ndërprerja e komunikimit./Panorama
