CNN – Ajo ka qenë e martuar me një prej personave më të kërkuar në botë, liderin e ISIS.
Në intervistën e saj të parë që prej lirimit nga një burg libanez, vitin e shkuar, Saja al – Dulaimi, për CNN rrëfen eksperiencën e saj si bashkëshortja e Abu Bakr al – Baghdadi dhe frikën që ka për vajzën e lindur prej tij.
Gazetari i CNN e ka realizuar intervistën me 28 – vjeçaren Dulaimi në një vend sekret, pranë kufirit mes Libanit dhe Sirisë.
CNN sqaron se nuk ishte në gjendje të verifikonte asnjë nga deklaratat e saj, që prej detajeve të marrëdhënies me Baghdadi e deri tek insistimi se ajo nuk e mbështet në asnjë mënyrë terrorizmin. *Në fakt, ajo ka qenë pjesë e një burgu me anëtarë të frontit të al Nursa, si dhe me të akuzuar për lidhje me al Qaedën, kjo sipas një zyrtari libanez.
Megjithatë, ja çfarë deklaron Dulaimi:
E lindur në Irak nga një familje konservatore e shtresës së mesme, Dulaimi u martua me Baghdad -in në 2008 –ën.
Ajo thotë se, në atë kohë, ai nuk ishte një terrorist i pashpirt.
“U martova me një njeri normal, të studiuar. Ai ishte një njeri familjar”, shprehet ajo.
Dulaimi nuk ishte gruaja e tij e vetme, ajo e ndante atë me gra të tjera.
“Shkonte në punë dhe më pas kthehej në shtëpi tek familja e tij. Ishte i mrekullueshem. Një baba shembullor. Mënyra sesi sillej më fëmijët… ishte një mësues. E keni parasysh si janë mësuesit. Ai dinte si të sillej me fëmijët”.
Por ata nuk bisedonin shumë me njëri – tjetrin, siç bëjnë zakonisht çiftet. Arsyeja? “Ai kishte një personalitet të mistershëm”, shprehet Dulaimi.
Mia Bloom, profesoreshë në Universitetin e Georgia –s dhe studiuese mbi terrorizmin shprehet se, i duket e logjikshme që Baghdadi po bënte një jetë të dyfishtë dhe se guaja e tij dinte pak ose asgjë për këtë.
“Arsyeja përse ai nuk i tregonte asgjë, ishte sepse ajo s’kishte lidhje me jetën tjetër të tij”, shprehet për CNN Bloom.
Megjithatë, Dulaimi e dinte ekzistencën e gruas së dytë të Baghdad -it, që nuk ishte dakord me idenë që ajo të ishte pjesë e portretit famijar.
“Është e vështirë për dy gra që të jetojnë bashkë”, shprehet Dulaimi.
Sipas saj, martesa e tyre kishte marrë fund 7 vite më parë.
Dulaimi thotë se u arratis nga Baghdadi pasi ngeli shtatzënë. Ajo nuk tregon arsyen ekzakte, por shprehet se nuk ndihej e lumtur.
Thotë se nuk e dashuronte dhe fakti që u largua prej tij është provë.
Ai u përpoq ta bindte që të rikthehej me të disa herë, por Dulaimi tregon se ajo e kishte ndarë mendjen. Hera e fundit që ata folën ishte në 2009 –ën, kur Baghdadi u përpoq ta bindte sërish që të rikthehej me të.
Dulaimi rrëfen se nuk i kishte treguar se kishte lindur një vajzë, por gjithsesi më vonë ai e mori vesh dhe i tha se do t’ia merte vajzën kur ajo të rimartohej.
Sot thotë se ndihet e frikësuar për të bijën: “Kam frikë nga të gjithë”.
Dulaimi rrëfen se ndihet e shqetësuar për të bijën, që dëshiron të edukohet jashtë. “Tashmë është ajo që vuan, pasi ka mbi supe peshën e gjithçkaje ka ndodhur”, shprehet ajo.
Tanimë, nëna e re ëndërron për një jetë më të mirë me të bijën në Europë. Ajo dëshiron që vajza e saj të shkojë në shkollë, pasi beson se do të jetë një jetë më e mirë dhe më e sigurtë për të.
“Dua të jetoj në një vend Europian, jo arab. Dua që fëmijët e mi të edukohen dhe të kenë një jetë. Edhe nëse nëna e tyre ka qenë e martuar me Abu Bark al – Baghdadi, një terrorist … ç’faj ka fëmija në këtë mes?”
Bloom, ekspertja mbi terrorizmin thotë se, Dulaimi ka arsye për të qenë e frikësuar për fëmijën e saj, si nga agjentët e Baghdad -it që mund ta rrëmbejnë, ashtu sikurse edhe nga kundërshtarët e ISIS, që mund të përpiqen që të hakmerren në kurriz të tyre.
Sipas Bloom, fëmijët janë në rrezik të madh.
Dulaimi u arrestua në 2014 – ën në Liban, pasi kaloi kufirin nga Siria, në atë që një burim e quajti si një “operacion të planifikuar”.
Një vit më vonë, autoritetet e lanë të lirë sëbashku me një grup islamikësh, në këmbim të trupave libanezë, të kapur në frontin e al Nursa, deklaroi për CNN një zyrtar i sigurisë, me paktin që do t’i ruhej anonimati.
Al Nursa, që sipas autoriteteve konsiderohet si më i rrezikshëm për SHBA sesa ISIS, rivalin e tij në Siri, ka lidhje të shumta me Dulaimin. “Një prej vëllezërve të saj është figurë e Al Nursa dhe bashkëshorti i saj i ri dyshohet si i përfshirë me grupin”, tha një tjetër burim i sigurisë libaneze për CNN.
E megjithatë, Dulaimi thotë se i vjen keq që do të shihet gjithmonë si ish – gruaja e Baghdad -it, si dikush që mbështet terrorizmin.
“Konsiderohem terroriste, por nuk kam asnjë lidhje me të”, shprehet ajo.
Sipas saj, europianët duhet ta pranojnë, pavarësisht marrëdhënies së saj në të shkuarën me Baghdad -in.
“Ku qëndron faji im kur unë kam qenë e martuar me të në 2008 – ën? Tashmë jemi të divorcuar. Isha unë që e lashë atë dhe jo e kundërta”.
“Jam një grua që kam kaluar shumë dhe kam vuajtur edhe burgun”, shprehet Dulaimi.
“Nëse do të kisha dashur të jetoja me të, do të kisha bërë një jetë prej princeshe. Mund të isha bashkuar me ta dhe të kisha shumë para. Por nuk i dua paratë. Ajo që dua është të jetoj e lirë, të jetoj si gjithë të tjerët”. /CNN (Marrë nga Klan)
