Një aksident i ndodhur më 16 tetor të vitit 2010 shkatërroi familjen Gurra në Librazhd. Makina e drejtuar nga Ismet Gurra, në kushtet e errësirës dhe të një grope të krijuar nga punimet në atë kohë në Malin e Robit, në Kavajë, përfundoi në anën tjetër të rrugës, duke u përplasur me një maune.
Pasojat ishin tragjike për familjen që po kthehej nga një dasmë në Durrës. Vajza e drejtuesit, Resmie Gurra, vetëm 16 vjeçe, mbeti e vdekur në vend, bashkë me xhaxhanë e saj, Bujarin, 34 vjeç, ndërsa u plagosën rëndë shoferi, i biri dhe kunata e tij. Sot, për familjen e kryefamiljarit Hykmet Gurra, fatkeqësitë nuk kanë të sosur.
I moshuari tregon se ish-nusja e djalit të vdekur kërkoi dëmshpërblim për pasojat e aksidentit. Gjatë procesit gjyqësor rezultoi nga kompania e sigurimit se në atë moment mjeti nuk ishte i siguruar, çka detyron Byronë e Sigurimeve që t’ia faturojë pagesën personit që cilësohet fajtor për aksidentin, pikërisht vëllait dhe babait të dy viktimave. Një shumë kjo që arrin afërisht 29 milionë lekë të rinj.
Babai i Ismet Gurrës, i cili jo vetëm që humbi familjarë, por tani përballet dhe me proceset gjyqësore, thotë se në asnjë mënyrë i biri nuk mund të shpallet fajtor për aksidentin. “Rruga ishte e dëmtuar, pasi po kryheshin punimet në atë kohë. Eksperti e ka cilësuar këtë në aktin e përpiluar prej tij, duke u shprehur se dalja nga rruga e makinës ndodhi për shkak të rrugës e jo prej drejtuesit. Kjo nuk u mor parasysh.
Nuk u mor parasysh as ligji që thotë se, kur palët e dëmtuara janë të afërm mes tyre, nuk mund të kërkohet dëmshpërblim. Djali im është invalid nga aksidenti që pësoi, po trajtohet me kemp, ndërsa të birin e ka të paralizuar. Çfarë mund të paguajë ai?!”, shprehet Hykmet Gurra.
Çështja për të cilën kryefamiljari thotë se do ta çojë deri në Strasburg, endet ende nëpër gjykata. Vendimi më i fundit i takoi Gjykatës së Apelit në Durrës, e cila rrëzoi argumentet e mëparshme, duke gjetur si gabim në shqyrtimin e dosjes datën e aksidentit, (e shënuar në çështje 16 gusht dhe jo 16 tetor), si dhe faktin që kërkesa për dëmshpërblim në Gjykatën e Elbasanit u bë në një kohë kur gjykata nuk kishte marrë vendim të formës së prerë për fajtorin e aksidentit. /Panorama
