Ekspertët ndërkombëtarë nuk kanë gjetur shkelje në demarkacion e Kosovës me Malin e Zi, dhe sipas tyre gjithçka është me standarde ndërkombëtare, ka deklaruar presidentja Atifete Jahjaga.
“Nga aspekti ligjor dhe teknik, ekspertët ndërkombëtarë nuk kanë gjetur shkelje, dhe kanë vlerësuar se procesi u është përmbajtur rregullave ligjore. Duhet të theksoj se i tërë procesi është dashur të jetë më transparent, përfshirë familjarizimin e qytetarëve, hartat dhe gjetjet gjeodezikë”, tha Jahjaga në konferencë për media.
“Ky komision i thirrur dhe i zgjedhur nga unë, gjatë punës së tij ka biseduar me një spektër të gjerë, qytetaresh, ekspertësh, dhe kryetar partish.
Ftoj institucionet dhe spektrin politikë që të reflektojnë këto vlerësime dhe rekomandime”, shtoi ajo.
Sakaq, eksperti amerikan Fletcher Burton, i ftuar për të vlerësuar procesin e demarkacionit ka thënë se Komisioni i Kosovës e ka kryer mirë punën.
“Procesi kishte një bazë shumë të fortë ligjore. Kemi gjetur se nga aspekti ligjor procesi dhe puna e Komisionit kosovar Shtetëror për Shënimin e Kufirit me Malin e Zi ka pasur legjitimitet” ka thënë Burton.
