Prokuroria e Tiranës kërkoi dje dënimin me 6 vjet burg për një punonjës banke në Tiranë të akuzuar për pornografi me të mitur.
I akuzuari i kësaj çështje u arrestua me urdhër të Prokurorisë në korrik 2015 dhe më pas u izolua në qeli me urdhër të Gjykatës.
Enkel Vela, punonjës në sektorin e IT në një bankë private në kryeqytet, sipas akuzës ka mbajtur, ruajtur dhe arkivuar një sasi të madhe fotosh dhe videosh “të turpshme”.
Fjala është për pamje neveritëse të abuzimit seksual me fëmijë. Sipas Prokurorisë, imazhet dhe videot në shumicën e rasteve janë skena të vërteta të regjistruara jashtë Shqipërisë, por të përhapura përmes një rrjeti ndërkombëtar të pornografisë.
Hetimi për këtë rast ka nisur pas një njoftimi që Interpoli gjerman ka bërë ndaj shtetit shqiptar në lidhje me rrjetin e pornografisë.
“Nga Interpol VViesbaden, Sektori për Krimin Kompjuterik ka marrë një informacion në lidhje me shpërndarjen në rrjet të materialeve pornografike me të mitur nëpërmjet rrjetit ‘eDonkey2000′”, thuhet në një vendim të mëparshëm të Gjykatës në lidhje me çështjen.
Sipas tij, kërkimet kanë treguar se klientë të ndryshëm kanë ofruar 100 % kopje të materialit të kërkuar në rrjetin “eDonkey”, i cili gjithashtu është ruajtur dhe nga Zyra Kriminale e Policisë së Shtetit Baden VVurttemberg.
Pedofilia në Shqipëri
Materiali përmbante video pornografike me fëmijë, duke treguar abuzimin seksual ndaj disa fëmijëve, dhe më saktësisht një vajzë që prezumohet e moshës 4 vjeçe, një djalë që prezumohet i moshës 7 vjeç, një vajzë që prezumohet e moshës 8 vjeçe. Autorët dhe viktimat janë identifikuar në vitin 2011.
Nga studimi i materialeve të vëna në dispozicion për kërkimet e kryera, rezulton se nga Shqipëria, më datë 01.04.2015, ora 13:21:35, është gjeneruar raporti që ka disponuar materialin pedofilik. Duke kryer verifikime dhe hetime në lidhje me linjën e përdorur nga shkarkuesi i materialeve, Prokuroria ka bërë identifikimin e shtetasit Enkel Vela si personi që ka aksesuar dhe shkarkuar fotot e videot.
“Pas kontrollit në banesën dhe në zyrën e tij me autorizim nga Gjykata, rezultoi se i pandehuri kishte ruajtur 320 GB materiale me foto dhe filmime të abuzimit me fëmijët e mitur”, tha Prokuroria.
Sipas saj, nuk është provuar deri tani ndonjë veprim konkret nga i pandehuri, por mbajtja dhe shpërndarja e materialeve të tilla është krim.
Njëri nga autorët që i ka prodhuar materialet në fjalë është dënuar tashmë në Belgjikë me burgim./ Panorama.al/ Trazhgim Sokolaj
