Tri ditë pas arrestimit të Salah Abdeslam, lagjja Molenbeek në Bruksel i është rikthyer normalitetit ndërsa dhjetëra gazetarë nga e gjithë bota vërshuan në lagjen që u vendos në qendër të vëmendjes së mbarë botës pas atentateve të 13 nëntorit të kaluar në kryeqytetin francez.
Gazetarja Aurora Allushaj na sjell ekskluzivisht për Report TV, rrëfimet e banorëve, mes tyre dhe shqiptarë mbi operacionin për kapjen e 26 vjeçarit Abdeslam.
Ajo çka mbetur nga aksioni i policisë në lagjen Molenbeek të Brukselit, ku u arrestua Salah Abdeslam, i shumëkërkuari për atentatet e 13 nëntorit në Paris, është kjo njollë gjaku, para portës së banesës ku ai fshihej gjatë 4 muajve që qëndroi në arrati.
Dy ditë më pas rruga Quatre Ventes në këtë lagje u mbi popullua nga gazetarë nga e gjithë bota që kërkojnë të dinë më shumë për 26 vjeçarin e që akuzohet për përfshirje në atentatet që i morën jetën 130 personave.
Farmacistja ngjitur me banesën ku Abdeslam u arrestua tregon se njihte vetëm prindërit e të shumëkërkuarit, por jo atë personalisht.
Kanë frekuentuar disa herë farmacinë time dhe më janë dukur njerëz të qetë, normal. Unë njihja vetëm prindërit e tij, jo Salah personalisht.
Ishin njerëz të qetë dhe normal.
Ajo çka na bie në sy, përballë me numrin 79 të kësaj rruge, ku ndodhet dhe apartamenti i Abdeslam, dikush nga familjet marokene që jetojnë aty pranë, ka nxjerrë në një karrige çaj dhe kafe siç e do zakoni në të tilla raste.
Një i ri Italian i cili punon kamarier pranë banesës së Abdeslam tregon se lagjja Molenbeek është një zonë e qetë pavarësisht faktit se ka një përzierje kombësish.
Unë isha duke punuar, më mori babai në telefon dhe më tha mos hajde në Molenbek se ka një operacion policie, por unë nuk pashë gjë.
Pavarësisht kësaj që ndodhi ndihem i sigurt, në këtë lagje nuk është se kam patur frikë ndonjëherë. Këtu ka italianë, marokenë, francezë madje edhe shqiptarë.
Ka edhe bullgarë, pra ka shumë kombësi por shumica janë marokenë.
Vetëm 40 metra nga vendi ku u arrestua Salah, ndodhen dy kafene me pronarë shqiptarë.
Në një intervistë për Report TV, kamarieri i bar Graffiti, Fidan Hoxha tregon se gjendja në përgjithësi është e qetë. Në momentin e arrestimit të Abdeslam, ai ndodhej në punë dhe mundi të shohë gjithë operacionin e policisë.
Pronari i Lokalit, gjithashtu banor i zonës prej shumë vitesh Zeqir Mushiu thotë se është mësuar me këto situata dhe kontrollet e policisë pasi ka vite në Molenbeek.
Ai shprehet se Salah jetonte aty pranë por vetë nuk e njihte personalisht.
Edhe banorët e tjerë thonë se Molenbeek është një lagje e qetë pavarësisht
Është gjithmonë shumë qetë këtu, nuk patur asnjëherë probleme.Salah Abdeslam u arrestua të premten e kaluar gjatë një operacioni masiv të forcave belge, vetëm 500 metra larg shtëpisë së tij në Molenbeek.
Vëllai i tij Brahimi, ishte një prej atenatorëve që hodhi veten në erë gjatë sulmeve të 13 nëntorit në Paris. Imami i xhamisë në Molenbeek thotë se veprimet e këtyre njerëzve nuk kanë të bëjnë aspak me islamin.
Ne diferencohemi prej këtyre njerëzve dhe përgëzojmë madje arrestimin e Salah Abdeslam.
Abdeslam i cili është me origjinë marokene, akuzohet për akte terroriste dhe sipas autoriteteve franceze, ai ishte personi që transportoi atentatorët në objektivat ku u kryen sulmet dhe që ndihmoi në prodhimin e eksplozivit të përdorur në shpërthimet.
Ahmet Gjana, deputet i Parlamentit te Brukselit dhe Këshilltar në Komunën Molenbeek shprehet për Report TV se arrestimi i Abdeslam nuk ka asnjë ndikim për komunitetin e shqiptarëve që jetojnë këtë zonë të Brukselit, por do të ndihmojë për ti rikthyer qetësinë dhe emrin e mirë lagjes Molenbeek.
Që prej sulmeve të 13 nëntorit në Paris, lagjja Molenbeek në Bruksel u vendos në qendër të vëmendjes së mbarë botës, ndërsa autoritetet belge kërkonin personat e dyshuar lidhur me atentatet që i morën jetën 130 personave në kryeqytetin francez.
Më shumë se gjysma e popullsisë prej 95 mijë banorësh në këtë lagje, janë myslimanë, kryesisht emigrantë marokenë apo pasardhësit e tyre.
Kjo zonë ka patur edhe në të kaluarën mjaft problem me shkallën e lartë të kriminalitetit, papunësinë mes të rinjve dhe mbipopullim veçanërisht në lagjet e varfra të emigrantëve./ Shqiptarja.com Aurora Allushaj
