Projektligji i shumëdebatuar “Për masat shtesë të sigurisë”, që i detyron institucionet publike dhe bizneset private të pajisen me kamera sigurie me cilësi të lartë, ka përçarë maxhorancën.
Projektligji i propozuar nga ministri i Brendshëm, Saimir Tahiri, është votuar kundër nga Grupi Parlamentari i LSI-së, ndërkohë që është miratuar me numrin më të ulët të votave, vetëm 61 vota pro. Nisma në fjalë ka marrë fillimisht në parim vetëm 59 vota pro, ndërkohë që gjatë shqyrtimit ministri Tahiri ka pranuar amendamentin “Braho”, i cili ishte kundër mbylljes së bizneseve që nuk pranonin të vendosnin kamerat me shpenzimet e tyre.
Gjatë votimit të projektligjit ra në sy fakti se dhe tre deputetë të PD-së votuan kundër projektligjit për kamerat e sigurisë. Opozita edhe pse ishte në Kuvend nuk mori pjesë në votime, për shkak se qëndrimi i tyre me votë do të shprehej vetëm për dërgimin e mandatit të Koço Kokëdhimës në Gjykatën Kushtetuese. Ndërkohë që tre deputetët Mhill Fufi, Gjovalin Bzhetaj dhe Alban Zeneli votuan kundër ligjit të kamerave. Nga ana tjetër, nga radhët e LSI-së, deputetët Përparim Spahiu, Bujar Derveni, Ylli Shehu, Vangjel Tavo, Silva Caka, Kejdi Mehmetaj, Luan Rama, Petrit Vasili, Shkëlqim Selami, Bujar Kllogjeri dhe Edlira Çekrzi votuan kundër. Vetëm Ilir Meta, Spartak Braho, Gledion Rehovica dhe Gjovalin Kadeli votuan pro ligjit. Ndërkohë që e vetmja votë abstenim ishte ajo e deputetit Piro Kapurani.
