Kryetari i PD-së Lulzim Basha ka akuzuar sot qeverinë për situatën e rënde ekonomike në vend.
i ftuar në forumin për “liri ekonomike”, Basha ka deklaruar jo pa ironi se partitë e majta në pushtet PS dhe LSI i kanë befasuar të djathtët, për besimin e madh që po tregojnë ndaj ofrimit të gjithë shërbimeve ndaj sektorit privat.
“Ndonëse ka dy parti që emërtohen dhe vetëemërtohen socialiste, po në këto dy vite e gjysëm nuk kanë reflektuar asgjë socialiste. Një shtet kleptokrat të inkriminuar dhe me tendenca të forta të totalitarizmit. Taksa të ulëta apo të larta, investime në sektorin social për të rritur barazinë, apo përpjekje për të shtuar lirinë e ndërmarrjes me qëllim krijimin e më shumë vendeve të punës dhe mirëqënies përmes një formule që funksionoi për 25 vite. Nuk kemi pasur kohë për këtë debat” tha ai.
Sipas Bashës, taksat janë rritur, akcizat janë rritur po paratë nuk përfundojnë në arkën e shtetit. “Ky është një regjim kleptokrat. PS dhe LSI na kanë befasuar ne PD, partinë e lirisë ekonomike, 2 km djathtas nesh ne besimin e madh që kanë te sektori privat për të administruar fusha të jetës. por ndryshimi ka marrë formë perverse” tha Basha.
Basha pohoi se PS e LSI, “ka kaq pak besim te idealet e veta socialiste sa po i beson gjithçka sektorit privat, jo të gjithit në fakt, por një grupi njerëzish të lidhur ngushtë me pushtetin dhe ca kompanive të panjohura”.
