Androkli Kokthi, kreu i arrestuar i Drejtorisë së Tatimeve Tiranë, i ka kërkuar Gjykatës ditën e djeshme, lirimin me pretendimin se është i pafajshëm.
Kokthi po procedohet pas lirimit dhe kthimit te pronari të një sasie malli të konfiskuar nga Tatimet.
Sipas Prokurorisë, malli ishte bllokuar për shkak se nuk shoqërohej nga faturat tatimore, por Kokthi ka firmosur një shkresë, përmes së cilës malli i është rikthyer subjektit tregtar. Malli në fjalë, pjesë këmbimi me vlerë 4 milionë lekë të rinj, është liruar 40 ditë pas konfiskimit.
Në seancën gjyqësore për caktimin e masës së sigurisë, të zhvilluar me dyer të mbyllura për median, i dyshuari Kokthi e ka kundërshtuar me forcë akuzën.
Burime brenda sallës bënë me dije se ai ka pretenduar se nuk ka kryer asnjë shkelje ligjore. Gjatë fjalës së tij, i dyshuari ka rrëfyer se ka punuar për vite me radhë në administratën shtetërore, ku ka treguar përkushtim dhe përgjegjshmëri.
Më herët, mbrojtësi i tij, avokati Maksim Haxhia, i ka kërkuar gjykatës lirimin e klientit të tij. Avokati ka pretenduar se nga përgjimet 8 mujore që i janë bërë të mbrojturit prej tij, nuk është konstatuar asnjë takim, apo kontakt me përfaqësuesit e subjektit tregtar, për të cilin dyshohet të ketë “shpërdoruar detyrën”.
Mbrojtësi ka pretenduar se bëhet fjalë për një konflikt administrativ, por jo për një fakt penal.
Me gjithë kundërshtitë e palës mbrojtësë, gjyqtarja Arjana Caco pranoi kërkesën e prokurores së çështjes, Elsa Miha, duke e vlerësuar të ligjshëm arrestimin e Androkli Kokthit dhe caktoi ndaj tij masën e sigurimit personal “arrest në burg”.
Teksa doli nga godina e gjykatës për t’u futur në automjetin që do të çonte në paraburgim, Kokthi u brohorit nga të afërm dhe miq të mbledhur aty pranë.
PROKURORIA
Në kërkesën e bërë në gjykatë për lënien në qeli të të dyshuarit Kokthi, Prokuroria e Tiranës pretendon se ai ka shkelur ligjin gjatë procedurës për kthimin e mallit të konfiskuar subjektit tregtar “L. B.”
Sipas Prokurorisë, përmes këtij veprimi në përmbushje jo të rregullt të detyrës prej tij, Kokthi i ka sjellë përfitim të paligjshëm subjektit privat dhe njëkohësisht i ka shkaktuar shtetit një dëm ekonomik në shumën 3.9 milionë lekë.
Nga hetimi ka rezultuar se sasia e mallit në fjalë është konfiskuar më 13 mars 2015, pasi një grup inspektimi kanë konstatuar se ai nuk ishte i shoqëruar me fatura tatimore.
Sasia e mallit i është kthyer pas subjektit “L. B.” bazuar në një shkresë të datës 23 prill 2015, të firmosur nga drejtori i Tatimeve, Kokthi.
Në këtë shkresë, i dyshuari Kokthi shfuqizonte procesverbalin e konfiskimit dhe saktësonte se subjekti “L. B.” ishte i pajisur me NIPT-in përkatës dhe me dokumentacion të rregullt për mallin e konfiskuar.
Sipas Prokurorisë, në praktikën që Drejtoria e Tatimeve Tiranë zotëron në lidhje me procedurat e ndjekura për këtë subjekt tregtar, mungojnë dy shkresa, kërkesa e kompanisë private, mbi bazën e të cilit është liruar malli, si dhe shkresa e Kokthit për shfuqizimin e konfiskimit dhe kthimin e mallit.
SHKELJET
Nga hetimet e deritanishme, Prokuroria e Tiranës vëren katër shkelje të kryera nga ana e Kokthit.
Sipas Prokurorisë, kryetatimori Kokthi nuk ka kompetencë për të shfuqizuar procesverbalin e konfiskimit të mallit.
Procedura e kthimit të mallit pretendohet të jetë kthyer tej çdo afati të përcaktuar në ligj. Referuar organit të akuzës nuk ekziston ndonjë ankesë apo kërkesë e subjektit tregtar “L. B.” dhe po ashtu, vendimi i Kokthit për shfuqizimin e procesverbalit të konfiskimit nuk rezulton të jetë protokolluar dhe administruar në praktikën përkatëse të subjektit./ Panorama.al
