TIRANE- Partia Demokratike tha sot se pas këndit të lojërave që Bashkia do të ndërtojë tek parku i Liqenit Artificial fshihet projekti i një bar-restoranti. Sipas partisë në opozitë ndërtimin po e bën miku i Erion Veliajt
“Ai ndërhyn në një zonë të mbrojtur, duke prerë pemë, duke shkelur aty ku askush nuk guxoi për 25 vite, por ai po fsheh qëllimin e tij kryesor, klientelist e korruptiv”, tha deputetja Jorida Tabaku.
Më tej Tabaku deklaroi se: “Eshtë kafja dhe restoranti që do ia japë mikut të tij, arsyeja kryesore pse Erion Veliaj po ndërhyn në Parkun e Liqenit.
Kryetari i Bashkisë përpiqet ta fshehë këtë, me propagandë bajate sikur ai dhe vetëm ai mendon për fëmijët e qytetit.
E vërteta është se ai po mendon për klientelën dhe përfitimet e tij.
Siç e shihni në relacionin e pasqyruar dhe në ekran, Veliaj ka parashikuar ndërtimin e objekteve të shërbimit që janë kafe, restorant, kioske për gazetat.
E gjithë skema e tij ka qënë jo transparente.
Po në veçanti këtë kioske-kafe-restorant Veliaj është munduar t’ia fshehë publikut.
Kjo aferë ka dhe kosto financiare përveç të tjerash, me faturë 500 mijë euro nga taksat e banorëve të Tiranës.
Qytetarët e Tiranës dhe Partia Demokratike janë të vendosur të mos e lejojnë këtë paligjshmëri dhe sipërmarrje klienteliste të Erion Veliajt.
Parku i Liqenit nuk është oborri privat i kryetarit të Bashkisë.
Eshtë pasuri e qytetarëve dhe e tillë do të mbetet”.
