Nga Dritan Laci
Ai spo kuptonte gjë. Po ku ta kuptonte se ç’fliste kryetarja e tyre e Forumit Rinor EuroSocialist, kur as ajo vetë, vetveten se kuptonte. Saimir Tahirit gati i iku shikimi nga sikleti. “Prit o Zot se kush e di se çdo të na nxjerrë”, përtypej me vete, aq sa grimasat filluan ta tradhëtonin.
U rrek të merrte vesh ndonjë gjë te veshi ngjitur, por as kolegia ministre në krah, Harito, s’po s’nuk-te asgjëkundi nga ligjërata e Jolezës së tyre. Aq sa në një moment nuk po i mbante ngulur as karrigia ku ishin ulur. “Prit o Zot thoshin me vete, kur të na dali ndonjë e palarë kështu si e ka nisur”. Dhe nuk kishin faj pasi në momente të tilla sinqeriteti, pas një nate të zbardhur në pub, shprehja e parë që të vjen në një moment të tillë përçartje, si ajo e Jolezës, është shprehja popullore: “çka barku ti nxjerr bardhaku”.
Këtë bëri edhe Joleza e FRESH-it. Pas një nate dhogë, u zgjua në mëngjes dhe çtë shihte: kishte rënë në gjumë me rrobat e pub-it. Ashtu nëpër tym, i fundit që kishte parë kishte qenë ministri i Punës, Blendi Klosi. Iku kjo. Pasi i ra njëherë rrotull shtëpisë, u kujtua shpejt që shtëpia e saj nuk ishte shtëpia e saj. Nuk i kujtohej për qamet se si kishte përfunduar te shtëpia e shoqes së ngushtë.
Pastaj tha: “Ti fus një fresk në ballkon”. Kur çtë shihte, pallati që nuk ishte pallati i saj ishte i rrethuar nga njerëz të armatosur. U habit pa masë. Kur çtë shohë kishte fjetur ngjitur me Saimir Tahirin. Dmth te shtëpia ngjitur. Por shpejt u kujtua që kishte pasur një mirazh. Nuk kishte qenë Saimir Tahiri, por kryetari i bashkisë që pinte kafenë e mengjesit ngjitur me tavolinën e saj aty te Teatri Kombëtar.
Shumë e çuditshme. Aq sa vetë personalitetet e larta të Partisë Socialiste, të ulur në karriget pas podiumit. ku Joleza vazhdonte ligjëratën, duke filluar nga Kryeministri, ministri i Brendshëm e me radhë, u habitën pa masë se si Kryetarja e tyre e FRESH-it, i njihte kaq mirë dhe i kishte takuar aq shpesh.
Dhe se si sa herë zgjohej nga gjumi me rrobat e pub-it, i dilte përpara o ministri i Brendshëm, o ai i Punës, o i Bashkisë, ndërsa Kryeministri diçka më rrallë, pasi në fshatin ku ai jeton nuk ka pub-e dhe pallate ngjitur.
Dhe si për ti vënë kapak dhe pasi e kuptoi që e kishte menderosur, në një moment të thellë sinqeriteti, i futi një: “Në djall vafshin të gjithë”
Që ta bëjmë të pakuptueshmen të kuptueshme, kjo nuk është e folura në publik. Nuk ka se si të jetë kjo e folura në publik, për kryetaren e një Forumi serioz, që paçka se e kishte zënë gjumi me rrobat e Pub-it, nuk mund ta trajtojë podiumin e Partisë Socialiste, si mikrofonin e një nate të kaluar në karaoke.
Ky është minimumi i respektit edhe për ata socialistë që i kanë dhënë besimin për të qenë përfaqësuesja e rinisë së tyre, por edhe për kryetarin e Partisë Socialiste njëkohësisht edhe Kryeministër, i cili me siguri nuk do të jetë ndjerë aspak mirë, ndërsa i është dashur me pahir të dëgjojë përçartjen e kryetares së tij të FRESH-it.
Joleza zgjohu. Nuk je në pub. Dhe as unë dhe të tjerë që do të kritikojnë më vonë sa herë të flasësh përçart nuk janë gazetarë të Partisë Demokratike, siç i quajte në statusin tënd të fundit, ku vazhdon të mbrosh me këmbëngulje lajthitjen tënde të një nate pub-i / Opinion.al
P.S Ndoshta sot je më e kthjellët dhe mund ta shikosh edhe vetë se si e ke djallosur, ndaj po të japim mundësinë ta shikosh edhe njëherë se ç’ke thënë atë mëngjes pasi u zgjove me rrobat e pub-it, përballë socialistëve.
