Kapiteni i kombëtares shqiptare, Lorik Cana, po përjeton një periudhë shumë pozitive te klubi i tij, Nanta.
Të shtunën Cana ishte titullar në Tuluzë, duke qenë protagonist në barazimin 0-0.
Ai rezultat ishte i 11-ti pozitiv rresht për Nantën, që ka humbur për herë të fundit në nëntor, ndërsa në vitin 2016 ka fituar 5 e barazuar 3 herë mes kampionatit e kupës, me vetëm 6 gola të pësuar.
“Në Tuluzë mund dhe duhej të fitonim, por kundërshtari është cilësor, edhe pse lufton për mbijetesë, ndaj nuk kemi pengje”, deklaron Cana për mediat franceze, duke parë që tani nga ndeshja e radhës.
“Po luajmë çdo 3 ditë dhe fizikisht është shumë e vështirë, por tani ndeshemi me Bordonë për kupë dhe synojmë një tjetër ndeshje të madhe, për të ruajtur këtë moment, ndërsa të shtunën ndaj Lorientit do të tentojmë të rikuperojmë dy pikët e lëna në Tuluzë”, shton qendërmbrojtësi, i cili nuk i vë limite Nantës, që është pranë zonës europiane në Ligën 1.
“Renditjen nuk e shohim, sepse ka shumë skuadra në garë për vendet e para”.
“Jemi ambiciozë, duam të shkojmë sa më lart, por ende nuk e dimë sa është maksimumi ynë, ndaj llogaritë do t’i bëjmë në fund”. /Sportal.al
