Tre persona dërgohen në gjyq të akuzuar për të paktën nëntë vjedhje dhe grabitje në Tiranë, përfshi edhe pesë raste të hyrjes në banesa VIP në zonën rezidenciale “Long Hill” dhe “Acacia Hill” në kryeqytet.
Pak ditë më parë, më 18 janar, Prokuroria e Tiranës ka përfunduar hetimet për shtetasit Ardian (Saimir) Suti, Armend (Hysni) Krosi dhe Durim Rama. Ndaj tyre janë ngritur akuzat “vjedhja e kryer në bashkëpunim më shumë se një herë me pasoja të rënda dhe vjedhja e kryer në bashkëpunim më shumë se një herë, mbetur në tentativë”.
Përveç pesë grabitjeve në zonën rezidenciale, grupi prej tre personash akuzohet se në periudhën marsprill 20015 ka kryer edhe katër vjedhje të tjera në banesa në zonën e Kopshtit Zoologjik, në kryeqytet.
Pavarësisht aktivitetit të dendur kriminal dhe shumave e sendeve të kushtueshme që kanë vjedhur, grupi prej tre të akuzuarve është zbuluar falë një iPadi që kanë përvetësuar në një nga banesat VIP që kanë grabitur.
ARRESTIMI
Anëtarët e grupit të vjedhjeve janë arrestuar më 24 gusht 2015. Atë ditë ranë në pranga shtetasit Ardian (Saimir) Suti, Armend Krosi dhe Durim Rama.
Më 21 gusht 2015, në mëngjes herët, policia është njoftuar se në kompleksin “Acacia Hill” është vjedhur shtëpia e shtetasit B.M., ku persona të paidentifikuar kanë marrë një laptop të zi, marka HP, dhe një tabletë iPad, ngjyrë e bardhë, me mbështjellëse të zezë dhe 50 mijë lekë.
Në vendngjarje u konstatua se autorët kanë hipur në verandën e vilës, kanë hapur grilën dhe më pas përfituan nga fakti se një kanatë e dritares së ballkonit ishte gjysmë e hapur. Autorët e kanë hapur atë dhe kanë marrë sendet e përshkruara në procesverbal e më pas kanë ikur. Në vendngjarje nuk janë lënë gjurmë gishtash.
ZBULIMI NGA IPADI
Pasi kanë marrë të dhënat për pajisjet e vjedhura në banesën e personazhit VIP, hetuesit kanë arritur ta lokalizojnë pajisjen në fjalë. Ajo i është gjetur shtetasit me iniciale E.C., në Durrës, ku është bërë sekuestrimi i saj në cilësinë e provës materiale.
Mbajtësi i iPadit është pyetur dhe ka pohuar se më 22 gusht 2015, rreth orës 20:30, ka shkuar te një koleg i tij në Fermë Sukth, i cili ka një servis celularësh.
Pas një bisede aty, shtetasi me iniciale E.C., ka blerë aty një (tablete) iPad ngjyrë të bardhë, me mbrojtëse të zezë, duke paguar 8000 (tetë mijë) lekë. Pasi e ka blerë iPadin, ai ka tentuar ta ndezë rreth orës 23:00, dhe pasi pajisja është ndezur, ka parë një mesazh ku shkruhej se “ky iPad është i vjedhur dhe kishte numrin e telefonit të një personi, ku ai ka komunikuar të nesërmen me pronarin e pajisjes, dhe i ka thënë që të shkonte ta merrte, por duke i paguar paratë që ai kishte shpenzuar për ta blerë në Fermë Sukth.
DËSHMITË
Ndjekja e “duarve” në të cilat ka kaluar pajisja e vjedhur në banesën luksoze në Tiranë ka zbuluar edhe grupin që kryente krimet kundër pasurisë. Për këtë arsye, Prokuroria ka marrë në pyetje pronarin e dyqanit ku ishte shitur iPadi.
Ai ka shpjeguar se pajisjen ia kishte çuar në dyqan një person me emrin Durim Rama, që i kishte thënë se e kishte për ta shitur dhe se ia kishin sjellë nga Italia.
Po atë natë, pajisja ishte blerë nga shtetasi E.C. për 8 mijë lekë të rinj, personi që më pas do të lajmëronte pronarin e iPadit. Pas këtij momenti, hetuesit u përqendruan te shtetasi Durim Rama, duke kryer arrestimin e tij dhe më pas kapjen e dy bashkëpunëtorëve.
ROLET NË VJEDHJE
Gjatë marrjes në pyetje tre të akuzuarit kanë shpjeguar grabitjen e tri vilave gjatë muajit korrik 2015. Ata shpjeguan se shtetasi Durim Rama i ka transportuar me mjetin e tij të markës “Mercedes Benz”, ngjyrë gri, me targa italiane, shtetasit Sajmir Suti dhe shtetasin Armend Krosi, të cilët i kanë thënë që “na dërgo me mjetin tënd dhe nuk ke punë që të hysh te vilat dhe të njoftojmë ne kur të mbarojmë punë”.
Ai herën e parë ka dërguar me makinën e tij Sajmir Sutin dhe Armend Krosin rreth 1000 metra përtej një qendre tregtare, te një rrethim vilash, dhe më pas është larguar. I arrestuari ka thënë se ka shërbyer për dy të tjerët me makinë tri herë.
Në rastin e fundit si pagesë ata i kanë dhënë një laptop dhe një iPad, të cilin e ka lënë te një dyqan në Durrës për ta shitur me qëllimin për të marrë më pas lekët./ Panorama.al Trazhgim Sokolaj
