I tronditur nga ajo që ka ndodhur, gazetari Eni Shehu, ka gjetur mundësinë për Opinion. al të tregojë shkurtimisht atë çfarë ka ndodhur mes tij dhe drejtorit të Teatrit Kombëtar Hervin Çuli, këtë mbrëmje në hollin e këtij institucioni prestigjoz. Sipas gazetarit të ABC News, a ishte aty bashkë me gazetarë të tjerë i ftuar për të ndjekur premierën e shfaqjes “Tri Motrat”.
Në momentin e ndërrimit të akteve, ku të pranishmit në sallë janë lajmëruar për 15 minuta pushim, gazetari ka dalë në hollin e teatrit, aty ku në mënyrë të papritur sipas tij është ndeshur me dhunën dhe ofendimet e drejtorit të Teatrit Kombëtar, i cili si duket se ruante një inat të vjetër me gazetarin Shehu, për shkak të një materiali filmik që Shehu kohë më parë kishte përgatitur mbi mënyrën se si përzgjidhen aktorët në shfaqjet e Teatrit Kombëtar.
Drejtori Çuli, gjithmonë sipas të thënave të gazetarit Shehu, i është drejtuar këtij të fundit me fjalët: “More shkërdhatë, ti ke ardhur të prishësh shfaqjen time..”, ku më pas ka pasur edhe dhuna ndaj gazetarit. Ndërkohë që vetë gazetari ka thënë për Opinion.al se nuk ka bërë denoncim mbi rastin, ndërsa redaksia e informacionit të ABC News i ka kërkuar Kryeministrit Rama dhe Ministres së Kulturës, Milera Kumbaro, shkarkimin nga detyra të Drejtorit të Teatrit Kombëtar, Hervin Culi.
