Inspektori i Agjencisë Rajonale të Mjedisit, Taulant Manaj dhe sekseri i tij, Florian Progri, që u shfaqen me pamje filmike në emisionin “Stop” në Tv Klan, duke i marrë 3.5 milione lekë një qytetari në këmbim të një licensë mjedisore, u arrestuan nga policia një dite pasi Prokuroria lëshoi ndaj tyre urdhër ndalimet.
Inspektori Majan, 30 vjec, i lindur në Tepelene dhe banues në Tiranë u prangos nën akuzën për korrupsion pasiv të personave që ushtrojnë funksione publike, të kryer në bashkëpunim.
Ndërsa 23 -vjeçari Progri, i lindur në Peqin dhe banues në Tiranë akzuohet për korrupsion aktiv.
Ata dyshohet se kanë bashkëpunuar për t’u marrë para qytetarëve në këmbim të dhënies së lejeve mjedisore edhe herë të tjera, siç pranon edhe vetë Progri në videon e shfaqur në emisionin “Stop”.
Burime të Prokurorisë i thanë Televizionit Klan se pas arrestimit Progri e ka pranuar marrjen e parave, por ka thënë se e ka mbajtur të gjithë shumën për vetë dhe se personat e tjerë të përmendur prej tij nuk kishin dijeni për aferën.
Por sipas Prokurorisë, ky qëndrim është i dyshimtë, pasi në filmimet e transmetuara në emisionin “Stop”, inspektori Manaj shfaqet duke kërkuar fillimisht shumën prej 3 mijë eurosh e po kështu duke biseduar për shumën e marrë.
Siç shihet edhe nga fotoja Manaj dhe Progri ishin miq dhe dyshohet se kanë bashkëpunuar në dhjetëra raste të tjera ku “peshqit” ishin biznesmenët që kërkonin të pajiseshin me leje mjedisore.
