TIRANË- Miliona euro dëme i janë shkaktuar buxhetit të shtetit nga kompani që kanë vepruar me mashtrime e falsifikime. Duke bërë një bilanc të 6 mujorit të dytë të 2015-ës, Prokuroria e Përgjithshme thotë se nga përfitimi i paligjshëm dëmi në buxhetin e shtetit është 60 milionë euro. Akuza gjithashtu thotë se janë vendosur nën sekuestro pasuri të paluajtshme me vlerë rreth 45 milionë euro.
– Në muajin Tetor 2015, Prokuroria e Tiranës zbulon një skemë mashtruese me rimbursimin e fondit të ilaçeve, në vlerë rreth 2 milionë euro. Në krye të kësaj skeme dyshohet se është drejtuesi i kompanisë farmaceutike “Omega Pharma” Nadir Çausholli.
– Po në Tetor 2015, Prokuroria e Korçës zbuloi një skemë mashtruese financiare në vlerë rreth 1.5 milionë euro në tregun e materialeve inerte.
– Në muajin Nëntor 2015, Prokuroria e Tiranës zbuloi një skemë mashtruese financiare në tregun e shitjes së aksioneve të kompanisë së naftës “Fullpet”, në vlerë shmangie detyrimi ndaj shteti rreth 500 milionë lekë të reja.
– Në muajin Dhjetor 2015, Prokuroria e Tiranës ka përfunduar hetimet dhe ka dërguar për gjykim dy skema shumë të mëdha financiare, të shtrira në disa vite. Fillimisht, është dërguar për gjykim dy kompani “DIA-ADC”, dy kompani me administror Kastriot Ismailaj, me vlerë rreth 10 milionë euro.
Në vijim, Prokuroria e Tiranës përfundoi hetimet për një tjetër skemë mashtruese, “KGE”, me vlerë rreth 40 milionë euro, për të cilën akuzohen shtetasit Francesko Beketi dhe disa bashkëpunëtorë të tij.
– Në muajin Dhjetor 2015, Prokuroria e Fierit zbulon një skemë mashtruese financiare në tregun e karburanteve, me vlerë shmangieje detyrimesh ndaj shtetit rreth 2.5 milionë euro. Për këtë skemë konsiderohet përgjegjës administratori i kompanisë “Tea Oil”, Adrian Xhillari.
– Po në muajin Dhjetor 2015, Prokuroria e Tiranës zbulon një tjetër skemë financiare, kësaj radhë në tregun e lojëravë të fatit, me një dëm ndaj shtetit në vlerë mbi 1 milionë euro. Për këtë skemë, konsiderohen përgjegjës shtetasit Ndue dhe Paulin Preçi, administratorë të kompanisë së lojërave të fatit “Saturn Games”.
