Në tunelin Thirrëz-Morinë (Rruga e Kombit) qarkullimi i të gjitha makinave bëhet vetëm me zinxhirë.
Policia Rrugore porosit të gjithë drejtuesit e mjeteve që udhëtojnë në drejtim të Kukësit dhe anasjelltas, (por edhe ata që udhëtojnë në të gjitha akset rrugore) të shtojnë kujdesin gjatë drejtimit të mjeteve me synim parandalimin dhe shmangien e aksidenteve rrugore.
Veriu i vendit është përfshirë nga reshjet e dëborës. Sakaq moti i keq me reshje shiu e dëbore pritet të vijojë edhe ne ditët në vazhdim, ç’ka mund të sjellë përkeqësimin e situatës.
Vështirësi në qarkullimin e mjeteve në rrugë paraqiten edhe në qarqet e Korçës, Kukësit dhe Shkodrës.
Në të gjithë qarkun Kukës ka pasur reshje bore e cila ka arritur deri në 10 cm në qytetin e Kukësit dhe 15 cm në qytetin e Bajram Currit. Bora ka bllokuar edhe akset Krumë – Qaf –Prush.
Në Malësi të Madhe ka pasur reshje dëbore në zonën e Vermoshit dhe zonën e Thethit. Aksi rrugor Qaf -Thore – Theth është i bllokuar.
Në doganën e Kapshticës ka pasur një bllokim të aksit rrugor Bilisht – dogana Kapshticë, por janë marrë masat menjëherë me 2 borëpastruese për pastrimin e këtij aksi rrugor.
Disa probleme në qarkullim janë shfaqur edhe në aksin rrugor Korçë- Dardhë ku në pjesë të caktuara ka pasur bllokime.
Sipas parashikimeve meteorologjike, data 4 janar do të ketë reshje më të shumta në pjesën e dytë të ditës, ndërsa datat 5, 6 dhe 7 janar pritet të kenë sërish reshje bore në lartësitë mbi 700 metra.
Në verilindje, në zona të kufizuara, dëbora do të zbresë edhe në 500 metra. Por veç reshjeve të borës, do ketë dhe erë të fortë, e cila do të shkaktojë grumbullime të borës në vendet e ekspozuara, duke sjell dhe ngrica në disa akse rrugore në vend.
