Kryetari i komisionit të ligjeve, Fatmir Xhafaj ka hedhur poshtë zërat se Komisioni i Venecias, në raportin e tij paraprak ka rrëzuar amendamentet e propozuara nga mazhoranca.
“Sfidoj cilindo që thotë se Komisioni i Venecias ka rrëzuar ndonjë nga nenet e dërguara për opinion zyrtar ndaj projektiti kushtetues. Absolutisht po, që ka sugjerime për ta bërë më të mirë këtë projekt”, ka deklaruar Xhafaj në një komunikim me mediat.
Ai e ka vlerësuar si pozitiv faktin që më në fund të gjithë i janë bashkuar projektit kushtetues, si dhe vlerësimin që ka bërë Komisioni i Venecias, “mbështetur edhe në opinionet e grupeve politike, gjyqtarëve e prokurorëve për ta bërë më së miri, më cilësor e më të qëndrueshëm këtë projekt kushtetues”, ka thënë Xhafaj.
Sipas tij, nisja e reformës në drejtësi “ka qenë një proces i shkëlqyer, gjithëpërfshirës, transparent dhe profesional, me asistencën dhe standardet më të larta ndërkombëtare të fushës”.
“Ndihemi mirë që edhe ata që deri dje çfarë nuk kanë thënë për procesin, njerëzit që kanë punuar në të dhe produktet e tyre, sot janë rreshtuar përkrah reformës”, ka thënë Xhafaj.
Mazhoranca mbetet e vendosur, ka vijuar ai, “për të pasur një projekt kushtetues, produkt të ekspertizës më të mirë vendase e ndërkombëtare dhe jo produkt të interesave partiake, që e kanë katandisur drejtësinë këtu ku jemi sot”.
“Është një lajm shumë inkurajues fakti që PD e ka përqafuar idenë tonë të ditës së parë të punës së nisjes së këtij procesi, se Komisioni i Venecias është pika referuese e këtij procesi”, ka thënë Xhafaj.
“Uroj që entuziazmi i opozitës për raportin e Komisionit të Venecias të kthehet në një angazhim të sinqertë në tryezat e punës për të nxjerrë produktin që meriton Shqipëria dhe shqiptarët”, është shprehur Xhafaj.
Sipas tij, në opinionin paraprak KV ka dhënë vlerësime që shumë pak dokumenta të tilla kanë pasur fatin t’u adresohen kaq pozitivisht. Mes këtyre vlerësimeve, kreu i komisionit të ligjeve ka cituar:
“Komisioni i Venecias shpreh mbështetjen e tij për përpjekjen që po bëjnë autoritetet shqiptare për reformën e thellë në gjyqësor. Një reformë e tillë nevojitet në mënyrë të menjëhershme dhe situata kritike në këtë fush justifikon zgjidhjet radikale. Ndryshimet kushtetuese përfaqësojnë një bazë të qëndrueshme për punën e mëtejshme në këtë drejtim”.
“Kjo është një bazë shumë solide për të vijuar punën”, ka vlerësuar më tej Xhafaj./tch/
