TIRANË- Ka dështuar dhënia me koncension e Rrugës së Kombit. Ministria e Transportit njoftoi sot se “pasi shqyrtuam ofertat vendosëm ta anulojmë sepse ofertat që na erdhën ishin shumë të larta”.
Kinezët dhe turqit ishin në garë për këtë koncension. Ata ofruan përkatësisht 10.4 milionë euro dhe 12.3 milionë euro për 11 vite.
“Procedura u anulua dhe do të shohim për hapat që do të ndërmarrim për mirëmbajtjen e kësaj rruge”,deklaroi Ministria e Transporteve.
Sekretari i Përgjithshëm i Ministrisë së Transportit, Eduart Seitaj deklaroi se komisioni i vlerësimit të ofertave i përbërë nga MTI, MZHETS dhe ARRSH dhe i asistuar nga Banka Botërore, përmes IFC-së vlerësoi se ofertat e paraqitura nga dy kompanitë bien ndesh me interesin publik, pasi janë dy herë më të larta se sa pritshmëritë e komisionit dhe BB-së.
Sipas tij, aktualisht po diskutohet nëse do të ndjekim të njëjtën procedurë apo do të zgjidhim një model tjetër për tërheqjen e investimeve private në këtë vepër shumë të rëndësishme.
ARRSH, informoi Seitaj, është e autorizuar të marrë të gjitha masat e nevojshme për mirëmbajtjen e rrugës, pasi sezoni dimëror ka nisur tashme.
Sipas Seitajt, kompania “China Construction Commucination Company” L.T.D parashikonte 10.4 milion euro subvencion, ndërsa “Vendeka Bilgi Teknolojileri Ticaret L.T.D & Salillari” 12.3 milionë euro.
Autostrada Durrës-Kukës-Morinë nisi ndërtimin në vitin 2003 kur Banka Botërore financoi studimin e fizibilitetit që përshkon kjo autostradë dhe u hap në qershor të vitit 2009. Kjo autostradë e lidh Durrësin dhe Shëngjinin me vendkalimin kufitar me Kosovën në Morinë.
Autostrada Durrës-Kukës-Morinë eshtë rrugë që lidh kombin dhe i shërben rajonit, pasi është aks i rëndësishëm që na lidh me Ballkanin Lindor, por edhe me Europën Qendrore dhe Lindore.
