Vazhdon lufta në distancë midis Klubit të Tiranës dhe Partizanit, që ka marrë edhe më shumë flakë pas përfundimit të derbit, ku klubi Bardh e Blu i kërkon të Kuqve të dëmshpërblejnë stolat e thyer nga këta të fundit. Por për ta ndezur edhe më shumë këtë betejë në distancë është dashur deklarata e Saimir Shehrit, drejtor i Stadiumit “Selman Stërmasi”, i cili i ka kujtuar Partizanit vitet kur militonte në Kategorinë e Tretë. Por ka qenë i mënjëhershëm reagimi i Partizanit, i cili u kujton Bardh e Bluve se duhet të ishin në kategorinë e katërt për shkak të borxheve të papaguara. ndërsa ju urojnë një kampionat kampionësh në pozitat ku ata janë.
Reagimi i plotë i FK Partizani
“Deklaratave patetike të drejtuesve të Klubit Tirana, të karakterizuara me nota ironie të mbetura në tentativë, Klubi Partizani as nuk merr mundimin t’i përgjigjet pasi për ne do të ishte si të notoje në batakun e mediokritetit.
Por për hir të opinionit publik dhe për keqardhje njerëzore e ndjejmë për detyrë t’i sugjerojmë këtyre drejtuesve që t’i
lenë mënjanë këto përpjekje shumë të mundimshme për ta, pasi të bërit ironi është aftësi e njerëzve të mençur dhe jo gjithkush mund ta zotërojë një dhunti të tillë.
Vendimin e Komisionit të Disiplinës, Partizani do ta zbatojë sikurse ka zbatuar gjithmonë çdo të tillë, por i sjellim në vëmendje këtij komisioni të nderuar apo komisioneve të tjera pranë FSHFsë që kur vjen fjala tek borxhet apo detyrimet që klubet duhet tu shlyejnë klubeve të tjera dhe sidomos detyrimeve për pagat ndaj lojtarëve, duhet së pari të sigurohet zbatimi i vendimeve të marra prej kohësh tashmë, veçanërisht kur këto vendime janë bërë stivë në adrese të klubeve të caktuara.
Sa i përket ecurisë sportive dhe eksperiencave negative të mëparshme të klubit tonë, zotërinjtë drejtues të Klubit Tirana, dhe jo vetëm, e dinë fort mirë se egzistojnë informacione të mjaftueshme dhe të sakta dokumentacionale të cilat mund t’i bënin të ndjenin shijen e Kategorisë së katërt.
Sigurisht që nga padituria e mundshme mbase këta zoterinj nuk janë në gjendje ta deshifrojnë këtë frazë dhe për t’iu ardhur në ndihmë po i japim një sqarim të vogël:
Stiva e vendimeve gjyqësore të paekzekutuara, në rast kontrolli nga UEFA Financial Control Committee, automatikisht do t’ju dërgonte në Kategorinë më të ulët të mundshme si pasojë e thyerjes së shumëpërsëritur në UEFA Financial Fair Play.
Për të shlyer ato pak detyrime karshi klubit të Tiranës dhe për të mos shqetësuar më tej opinionin nga klithmat e vazhdueshme publike për çikërrima, i bëjmë sërish thirrje klubit Tirana të na dëgojë zyrtarisht nr. e llogarisë bankare.
Nëse nuk është e mundur, ndoshta edhe për shkaqet e lartpërmendura, atëherë jeni të lutur ti mundësoni përfaqësuesve tane një takim me Drejtuesit më të lartë tuaj, me të cilët të rakordojnë (numërojnë) personalisht si vlerën financiare, por edhe sasinë e biletave të mbetura, ashtu siç u bë dhe një ditë para derbit.
Vazhdoni një kampionat prej kampionësh aty poshtë ku jeni!
